Nongpoh, Nailur 21 : U Myntri Sorkar bad MLA ka Jirang Bah Sosthenes Sohtun ha ka sngi Nyngkong, ula hiar sha ka shnong Maikhuli ban peit thuh ia ka jinglong jingman hadien ka huri hura kaba mih na ka jingkynnoh wan kyntur pud ki nong Assam-kiba la shna jingker bad khang tala ia ki lynti shnong ha ka sngi Saitjain.
U Bah Sosthenes ula iakynduh ia ki Nongialam Shnong bad lum jingtip ia kaei kaba jia nalor ban sngap ia ki jingeh jong ki paidbah khamtam halor ki huri hura kiba mih na ka jingiakajia pud ka Meghalaya bad Assam.
Ki Nongialam Shnong kila ialam ia u MLA ban pyni ia ki jingker bala shna da ki nong Assam-kiba la pynpra pat da ki longkmie ka Maikhuli ha ka sngi Saitjain, kaba la leh da ka jingthmu ban kam trai ia ka madan Maikhuli da ki briew ka Assam.
U Bah Sosthenes ula pynpaw ia ka jingsngewkhia halor ki jingeh ba iakynduh ki nongshongshnong bad kular ba un sa pyn sangew sha ka Sorkar Jylla bad ialam ruh ia ki nongialam ka shnong Maikhuli ba iakynduh ia u Myntri Rangbah ka Jylla Conrad K Sangma ba kin iathuh kham bniah ia ki jingeh jong ka shnong.
Une u MLA ka thain, ula pynpaw ruh ia ka jingsngewkhia halor ka jingbym treikam ka soskular ban pynneh ia ka shongsuk shongsain bala iateh hapdeng ka Meghalaya bad Assam dang shen.
U Bah Sosthenes ula pyntip ba un sa kyntu ia u Deputy Commissioner ka Ri-Bhoi ba un iakren bad u Deputy Commissioner jong ka district na Assam, ban pynsangeh ia kane ka jingkyntur pud bad ban wanrah biang ia ka jingshong suk shong shngain ha ka thain.
