Pyndon bynta ka Sorkar ia ki Dorbar Shnong ha ka jingpynshisha ia ki Nongthep Vote

Sdang ka EKHD ia ka Special Intensive Revision ka Electoral Roll

Shillong, Jymmang 19 : Ka East KHasi Hills District kala pynsdang ia ki jingpynkhreh na ka bynta ka Special Intensive Revision (SIR) jong ka Electoral Roll bad pynbna ia ka jingleit pynshisha ia baroh ki nongthep vote ha man ki thliew iing kiba hap ha palat 1000 tylli ki polling station.

Kane ka SIR, kaba la leh halor ka jingbthah jong ka Election Commission of India (ECI), ka buh ia ka Meghalaya ha ka Phase-III jong ka jingpynthymmai ia ka Electoral Roll bala leh ha baroh kawei ka ri. Ki bor District ha ka sngi Nyngkong, kila batai ia ki nongmihkhmat na ki seng sain pyrthei bala ioh jingithuh ha Shillong halor ka roadmap, ka por bala buh bad ka rukom pyniaid ia ki kam jong kane ka SIR.

Ki borkhmih ki pyntip ba ka East Khasi Hills District ia mynta ka don 17 tylli ki Assembly Constituency bad 1021 tylli ki Polling Station.

Kat kum ka por bala buh ban leh ia ka SIR bala pyntip ha kane ka jingialang, ki Block Level Officer (BLO) kin leit rung na kawei ka iing sha kawei pat ban pynshisha ia ki nongthep vote naduh ka 30 tarik Jylliew haduh ka 29 tarik Naitung, katba ia ka draft electoral roll yn sa pynmih ha ka 5 tarik Nailar. Ia ka electoral roll kaba khatduh la buh ban pynmih ha ka 7 tarik Risaw, 2026.

La bthah ia ki seng sain pyrthei ba kin thung ia ki Booth Level Agent (BLA) ha man ki polling station ban pynthikna ia ka jingtreikam kaba shai bad ka jingiashimbynta ba shitrhem ha kane ka jingpynthymmai ia ka electoral roll.

Ka Ophis ka Deputy Commissioner kan sa thoh sha baroh ki Dorbar Shnong ha ka District ban pyntip sha ki halor ka SIR bad ban pan ia ka jingkyrshan bad jingiatreilang jong ki Dorbar Shnong ha kaban sam ia ki jingtip sha ki nongthep vote halor ka jingwan rung ki BLO sha ki iing ki sem jong ki bad ka jingbishar kyrteng ka ban pynlong da ki Electoral Registration Officers.

Ka District Election Officer kala kyntu ia ki seng sain pyrthei, ki nongthep vote bad ki kynhun ba don bynta lang ha ka kam ba kin iatreilang bad ki briew ka tnad election ban pynthikna ha kaban wanrah ia ka electoral roll kaba beit, kaba kynthup lang bad kaba lait na ki jingbakla.