Tura, Jymmang 19 : U Myntri Rangbah ka Jylla Conrad K Sangma hynne ka sngi Ba-ar, ula plie paidbah ia ka Complex ka 41 Meghalaya Battalion NCC ba dang shu pynkynriah thymmai ha Cherangre, Tura.
Inaugurated the newly relocated 41 Meghalaya Battalion NCC at Cherangre, Tura.
The expansion of NCC’s presence in Garo Hills will create opportunities for so many young people of the region.
The NCC continues to play a vital role in shaping leadership, discipline, patriotism,… pic.twitter.com/u0DqOr5OJv
— Conrad K Sangma (@SangmaConrad) May 19, 2026
Ka jingialang plie ka sdang da ka jingpdiang burom ia u Myntri Rangbah, pynbud da ka Guard of Honour, ka jingsoi ia ka visitor book, ot ribon, bad pynlait paidbah ia u maw kyrteng, bad ka jingthung dieng. Ka prokram ka kynthup ruh ia ka prayer dance da ki NCC cadet, ka jingiathuh khana ia ki jingshem da ki Cadet barim, ka jingpynkup burom ia ki cadet bad ka jingpyni riti dustur.
Haba kren ha ka jingialang, u Myntri Rangbah Conrad Sangmma ula kdew ïa ka bynta kaba kongsan jong ka NCC ha kaba pynrung ia ka jinglong discipline, ka jinglong nongïalam, ka mynsiem ieid ri, bad ka jinglong shimet jong ki samla. Ha kabaniew ïa kane ka jingplie kum ka “por kaba kongsan shibun,” u la ong ba ka jingïohi ïa ka jingpynkynriah bad ka jingbuh ïa ka battalion ha Tura ka “long kum ka jingphohsniew kaba la urlong.”
Haba ïasam ïa ki jingshem jong u shimet ha ka por ba dang khynnah, u Myntri Rangbah u la kynmaw kumno u la don ka jingangnud ban rung sha ki shipai bad hadien u la angnud ban long u Heh Pulit namar ka jingdon discipline, ka jingaiti, bad ka burom kaba don bad ki rang bad ki kynthei ha ka uniform.
U Myntri Rangbah ula ong ba kine ki jinglong ki dang long kiba kongsan mynta bad ula kdew ia ka jinglong kongsan jong ka NCC ha kaban pynlong ia ki nongshongshnong kiba don jingkitkhlieh bad ki nongialam ki ban sa wan. ‘Ka NCC ka wanrah ia ka discipline, ka mynsiem ieid ri, ka jingtrei shitom bad ka akor ka burom kaba pynwandur ia ki samla sha ki nongshongshnong kiba don ka jingkitkhlieh” ula ong.
Haba ban jur ia ka jingkongsan ka synshar khadar kaba pynleit jingmut sha ki samla, u Myntri Rangbah ula ong ba ka jingthew ba shisha ia ka roi ka par ka shong ym na ka jingpynlut ia ka pisa lane ki jingtei ba wanrah, hynrei ha ka jingdon bun ki jingim kiba kylla. “Ka jingjop jong ka Sorkar kam dei ia kaban thsew da katno klur ka pisa la pynlut lane katno tylli ki building bala tei. Ka dei ban thdew da katno ki jingim kila kylla namar jong kine ki jingkynshew” ula ong.
Ula ong ruh “Ka roi ka par kam dei ia kaban bishar tang na ka jingdon ki stadium ba ngi tei lane ki medal ba ngi jop. Ka dei ia kaban bishar ba kumno kine ki stadium kila pynjanai ia ki sap, ka jingsngew shaniah halade bad ka akor ka burom jong ki khynnah bad ki samla jong ngi”.
Haba kdew ia ka Youth & Sport Policy bala pynbna dang shen ha ka Cabinet on the Move ha Tura, ula niew ia kane kum ka “lynti iaid na ka bynta ka lawei jong ki samla jong ngi” kaba pynrung lang ia ka pule puthi, ki kam ialehkai, ka arts anad culture, ka sengkam sengjam, ki youth exchange programme, ka skill development. “Ka jingplie ia ka 41 Meghalaya Battalion NCC complex ka long shibynta na ka jingiohi kaba kham heh” ula ong. “Ka wanrah ia ngi shi kam shajan ban kynjoh ia ka lawei kaba ngi thmu na ka bynta ki samla jong ngi”.
Ka 41 Meghalaya Battalion NCC kadei kaba sdang n aka jingpynkha ia ka 15 Assam Artillery Battery NCC ha ka 3 tarik Jylliew 1961. La pynkiew kyrdan ïa kane ka unit sha ka 41 Meghalaya Battalion NCC ha u Risaw 2020. Ka battalion mynta ka kitkhlieh ïa ki kam hikai NCC ha ki 5 district jong ka Garo Hills.
Hapoh ka Border Area Expansion Plan, kane ka unit ka la pyniar ïa ka jylli jong ka na ki 3 college bad 6 skul sha ki 7 college bad 18 tylli ki skul. Ka battalion mynta ka don 7 company bad 1,120 ki cadet bad 24 ngut ki troop, bad kumba 2,400 cadet haduh u Iaiong 2026.
Ka jingpynkynriah ïa ka battalion na Shillong sha Tura ha ka 3 tarik Lber 2026, ka la urlong namar ba ka Sorkar ka la ai ïa ki ïing bad ka jaka ban pynheh ïa ki jingtei bad ki jingdonkam jong ka unit. Ka jingpynkynriah ïa ka 41 Meghalaya Battalion NCC sha Tura ka lah ban pynkhlaiñ shuh ïa ka jingdon ka NCC bad ka jingpoi sha kylleng ka thaiñ Garo Hills.
