Shillong, Jymmang 18: Ka Sorkar Meghalaya ka dang ap ban ioh jingmynjur na ka Sorkar Pdeng halor kiba bun tylli ki jingtyrwa ban plie ia ki Border Haat bad ki Land Customs Station ha khappud jong ka ri India-Bangladesh, iathuh u Symbud Myntri Rangbah ka jylla Bah Sniawbhalang Dhar ha ka sngi Nyngkong.
“Kila don katto katne tylli ki jingtyrwa kiba ngi lah phah sha ka Sorkar Pdeng ha kaba iadei bad ki Border Haat, Land Custom Stations” ong u Bah Dhar haba iakren bad ki nongthoh khubor.
“Ngi dang ap ban ioh ia ka jingmynjur na ka Sorkar Pdeng”.
Ula banjur halor ka jinglong jingman jong kine ki projek hapdeng kine ki artylli ki ri, ula ong, “Namar ba kane kadei ka kam kaba iadei bad kawei pat ka ri, ngi hap ban ioh ia ka jingmynjur na baroh arliang namar ngim lah ban plie tang na ka liang jong ka ri India bad ki ruh kim lah satia ban plie tang na ka liang jong ka ri Bangladesh.”
U Bah Dhar, ula ong ba ia kitei ki jingtyrwa mynta ki dang don hapdeng ka jingshah khmih bniah.
“Ki kam ki jam mynta ki dang don hapdeng ka jingshah khmih bniah jong ka Sorkar India, lehse lyngba ka jingiatreilang bad ka Sorkar Bangladesh” ula ong.
