Damas, Jymmang 18 : U Myntri Rangbah ka Jylla Conrad K Sangma mynta ka sngi ula buh ia u mawnongrim na ka bynta ka mini stadium ha Damas, kaba pyni ia ka sienjam ba kongsan ha kaban pynbun ia ki jingtei jaka ialehkai bad plie kham bun ki lad ia ki samla hapoh ka District.
Glad to lay the foundation for the construction of a Mini Stadium at Damas in North Garo Hills District.
Sports infrastructure is key to nurturing talent and creating opportunities for our youth. Meghalaya today has 240 sports projects either completed or underway across the… pic.twitter.com/CaSD8TzsUU
— Conrad K Sangma (@SangmaConrad) May 18, 2026
Kane ka prokram, bala pynlong da ka tnad Sports & Youth Affiars, kala long ha Sacred Heart Secondary School, Damas, North Garo Hills.
Kiba iadonlang ha ka prokram ki long u Timothy D Shira, Myntri ka tnad Tourism, Fisheries bad Agriculture, u Marthon D Sangma, Chairman, Meghalaya Tourism Development Corporation bad MLA ka 38-Mendipathar Constituency (ST), u Rupert M Momin, MLA ka 37-Kharkutta Constituency (ST), ki Ophisar na ka Tnad Sports & Youth Affairs, Agriculture, ki bor District, ki nongialam ka thain, ki samla pule bad ki riew paidbah.
Haba ai jingkren ha ka jingialang, u Myntri Rangbah ula ong ba ka jingdawa kaba la sahteng la slem jong ki samla ka Damas ban ioh ia ka madan ialehkai, mynta kala urlong da ka jingbei tyngka ba T.3.44 klur hapoh ka Tnad Sports & Youth Affairs ban shna ia ka mini stadium. Ula ong ‘Da ka jingbuh ia u mawnongrim, ka Sorkar kala kular paidbah ia ka song T.3.44 klur ban tei ia ka mini stadium ba thymmai ha Damas. Kane ka dei ka jingkular kaba sngewrit bala pynurlong sha ka shnong jong ngi”.
Ula ong ba kane ka project kan pynkylla ia ka madan ba don mynta sha ka madan ialehkai kaba janai bad kaba don ia ki cover gallery, open gallery, bad ki jingdonkam bala pynbha kiba dei ban don ha madan, bad bynrap ba “Kane ka mini stadium kaba la ap la slem bha kan shakri kum ka jaka ba lah ban pyndonkam ia bun kiei kiei na ka bynta ki samla jong ngi, ki skul bad ki jingialang jong ka Shnong”.
U Myntri Rangbah ula bynrap ba ka stadium kan pynlah ia ki nongialehkai ka thain ba kin ioh ia ka rynsan iakop kaba kham bun, haba pynpaw ba kan sa “pynlah ia ki nongialehkai jong ngi ba kin leit iashimbynta sha ki lympung ba shabar kum ha ki District, Inter-District bad Inter-State”.
Ula pynpaw ruh ba ka Sorkar ka dang trei ia ki kam ban pynurlong ia ka thong ha kaban pyntrei ia 510 tylli ki jingtei jaka ialehkai hapoh u 2028, da ka jingthmu ban pynmih ia ki nongialehkai kiba lah ban mihkhmat ia ka Ri ha ka 2032 Olympics, haba pynbna ba “yn ym don ki district, ki block, ne ki shnong ki ban shah ieh shadien”.
Haba kdew ia ki jingkynshew ha ri-lum Garo, ula ong ba palat T.400 klur lah ai ka jingkular na ka bynta ki 53 tylli ki project, katba ha North Garo Hills, khyndai tylli ki project ba shongdor T.33.81 klur la pyntrei naduh us nem 2018 ba kynthup ia ki stadium, ki basketball court bad ki jaka ialehkai indoor”.
Kiwei pat kiba la ai jingkren ki kynthup ia u Timothy D Shira, Myntri ka Tnad Tourism, Fisheries bad Agriculture ka Sorkar Meghalaya, u Deputy Commissioner ka North Garo Hills Abhishek Saini bad kiwei kiwei.
Ha kajuh ka por, kum shibynta jong kane ka prokram, la pynher lama ruh ia ki kali Mission Organic Value Chain Development for North Eastern Region (MOVCDNER) jong u snem 2024-25 bad 2025-26. Kine ki kali ki kynthup ia ki power tiller bala thied haph ka State Plan Scheme (Farm Mechanization) 2025-26.
