Damas, Jymmang 18 : U Myntri Rangbah ka Meghalaya Conrad K Sangma ha ka sngi Nyngkong, ula thalain tyngeh ia ki kynhun kiba kam trai ia ki kam ba trei da ka Sorkar MDA ba ialam da ka NPP tang ban ioh burom.
Khlem da jer iano iano, u CM ula kynthoh ba kine ki briew kila leh politics bad pynphriang ia ki jingtip ba bakla ha ki social media ban ialam bakla ia ki paidbah ba kin ieng pyrshah ia ka Sorkar.
U Conrad ula kren ia kane ha ka jingialang ba long ha Damas haba kdew ia ki kam ba jia mynta ha ki social media kiba pynphriang ia ki khubor lamler pyrshah ia ka Sorkar MDA ba ialam da ka NPP bad kynthoh ruh ia ka Sorkar halor ki kam ki bym don ba lah ban pynbeit da ki snem hynrei la lah pat ban pynbeit khatduh da ka Sorkar MDA.
U Conrad ula ong ruh ba ka Sorkar MDA ka dei kaba treikam kat kum ka nongrim treikam jong u nongialam barim (L) Purno A Sangma, kaba buh hakhmat eh ia ki paidbah ha baroh ki kam pynroi.
“Ngi kum ka Sorkar ngi la buh ia ka bha ka miat ki paidbah hakhmat eh jong ki kam pynroi bad ngi la trei na ka bynta ka jingmyntoi kaba bha eh na ka bynta ki briew jong ngi. Ngi la buh ia ka hok jong ki padibah trai ri trai muluk ha ka bynta ba hakhmat duh” ula bynrap.
Haba kren halor ki jingjia bapher bapher kiba la tynjuh ia ka Sorkar, ula ong ba ka Sorkar ba ialam daka NPP kala bat skhem ia ka nongrim ba kan nym pyni bor bad kam pat ju pyndonkam bakla ia ka bor pyrshah ia u paidbah. “Ngi la bat ia ka nongrim ban nym pyni bor ha man ki jingjia. Namar jong ngi, ki paidbah ki iai don hapdeng eh ha ka mat treikam jong ngi na ka bynta ka roi ka par”.
Ula ong ba ka Sorkar ka ngeit ha ki jingiakren bad jingiasyllok, bad ym ka jingpyndonkam ia ka bor ban pynsngap jar ia ki sur. “Ngi kwah ban wanrah ia ka lynti ban pynbeit ia baroh ki jingeh. Ngi ngeit ha ka jingsngap bad jingiakren bad ki briew jong ngi”.
“Ngi ieid ia ka Jaidbynriew bad ngim kwah ban iohi ia ka jingia umsnam, ngi iadon beit hantei ban ialam ia ka imlang sahlang da ka jingieid bad ka jingsngewlem”.
Ha ka por ba mih ka jingeh ba iadei bad ka GHADC, u pyntip ba ka Sorkar kala jubab ia baroh ki Sengbhalang bad ki paidbah baroh. “ Ngi burom ia ka jingsngew jong ki briew jong ngi bad ngi la jied ban rai ia kaei kaba ki paidbah ki kwah da kaba pynlong kongsan ia ka syrnot ST ha ka ban iakhun ia ka elekshon GHADC”.
“Kila don ki jingiakhih halor kane ka kam ha ki snem bala leit. Kane ka dei ka jingdawa kala la rim, ym pat ju don ki Sorkar kiba la leit noh, kiban rai ban pynbeit ia kane ka kam, hynrei ka Sorkar ba ialam ka NPP bad ka Executive Committee ka GHADC ba ialam ka NPP kala rai ban pynkylla ia ka ain ban weng noh ia ki bar jylla na ka jingiakhun ia ka elekshon ka Autonomous Council.
“Ha man ki kam ba ka Sorkar ka leh, ki paidbah ki dei kiba don hakhmat eh” ula pynsngew. Ula pyntip balah dep ban thung ia ka “Delimitation Committee bad la shim ruh ia ki lad ki lynti ban pynkhreh la ka jong ka electoral roll naka bynta ka GHADC.
“Ki paidbah ki iohi ia kaei kaba ngi leh. Kila leh mynleh bad ki drama ban khring ia ki briew ha ki social media, hynrei ia ki kam ba shisha bad ki jingpyrshang jong ka Sorkar yn sa rai bad bishar da ki paidbah ka Jylla. Ka jingkut jingmut jong ngi ka iai long kumjuh sha ki briew jong ngi, kiba la ai ka jingshaniah ha ngi”.
Ula kren ruh halor ki jingkylla kiba la wanrah da ki prokram sengkam sengjam ka Jylla kiba thmu ban pynkupbor ia ki samla bad plie ia ka lad iohkam iohjam hala ka thain :
PRIME (Promotion and Incubation of Market-driven Enterprises): Ka ai ia ki jinghikai ba bniah bha, ki nongpyni lynti (mentorship), bad ka jingkyrshan ban pynkylla ia ki buit treikam ba thymmai sha ka jingseng ia ki kam kiba lah ban iaid.
CM-Elevate: Ka tyrwa ia ka subsidy pisa (haduh 75%) ba ka jingkyrshan ram ha ka kam jngohkai, ka rep ka riang bad ki service sector ban iarap ia ki samla ba kin trei iala ki jong ki kam.
