Dep pynkhreh ka Meghalaya ia ka SIR ka Electoral Roll | Pan u CEO ia ki BLA na ki Seng Sain Pyrthei

Shillong, Jymmang 15 : U Chief Electoral Officer (CEO) ka Jylla Dr BDR Tiwari ha ka sngi Thohdieng, ula ong ba ka Jylla kala “pynkhreh pura” ban pynlong ia ka Special Intensice Revision (SIR) jong ka Electoral Roll hapoh ka wat kaba lai, kaba la pynbna da ka Election Commission ka India (ECI).

“Ka Meghalaya kala long kaba khreh ban leh ia ka SIR ha ka Jylla kat kum ka por bala buh da ka ECI” ong u Dr Tiwari hadien ba dep pyniaid ia ka jingialang bad baroh ki seng sain pyrthei.

“Ka Election Commission of India kala pynbna ia ka wat kaba lai jong ka Special Intensive Revision (SIR) na ka bynta ki Jylla bad ki UT ba dang sah jong ka Ri bad kumta, ka Meghalaya ruh kala hap lang ha kane ka wat jong ka SIR” ula ong.

Ia ka tarik ba dei hok na ka bynta ka revision la buh ban long ha ka 1 tarik Risaw, 2026 na ka bynta ka Meghalaya, Karnataka, Maharashtra, Jharkhand bad Delhi.

Haba batai ia ka por, u Dr Tiwari ula ong ba ki jingpynkhreh na ka bynta ka jingai jinghikai bad ka jingshon kan long naduh ka 20 haduh 29 tarik Jylliew, ban yn pynbud da ka jingleit rung na kawei ka Iing sha kawei pat da ki Booth Level Officers naduh ka 30 tarik Jylliew haduh ka 29 tarik Naitung. Ka jingpynbeit ryntih ia ki Polling Station yn pyndep lang hapoh ka 29 tarik Naitung.

“Ia ka draft electoral roll yn sa pynmih ha ka 5 tarik Nailar. Ka por ban phah ia ki jingkam bad jingpyrshah kan iaid naduh ka 5 tarik Nailar haduh ka 4 tarik Nailur, katba ia ka jingphah notice bad ka jingpynbeit ia ki jingkam kan bteng haduh ka 3 tarik u Risaw. Ia ka electoral roll ba khatduh yn sa pynmih ha ka 7 tarik Risaw” ula ong.

U Dr Tiwari u iathuh ba ki seng sain pyrthei kila ioh ia ka jingbatai kaba bniah halor kine ki kam ba hap ban leh.

“Ngi la ioh ia ka jingiakren ba nyngkong bad ka jingialang bad baroh ki seng sain pyrthei ka Jylla. Ia ka por bad ki kam ba donkam ban leh ha ka SIR la dep ban batai lut bad ia baroh ki jingkylli bad ki jingsngewkhia bala pynsngew da ki seng sain pyrthei ruh lah dei ban pynbeit” ula ong.

U CEO ula pan ia ka jingiatreilang ki seng sain pyrthei ha kaban thing ia ki Booth Level Agents.

“Ngi la kyrpad ia ki ban thung ia ki Booth Level Agent (BLA) na ka liang jong ki. Ngi khmih lynti ia ka jubab kaba bha na ki seng sain pyrthei namar ki BLA ruh ki long ki kynhun ba kongsan bha ha ki shnong ki thaw ba kin trei ha ki Polling Station ha ryngkat bad ki BLO ban wanrah ia ka jingtreikam kaba shai” ula ong.

“Ngi la kut jingmut pura ban pynlong ia kane ka SIR kaba shai, kaba laitluid, ka bym shah liang bad ban pynlong ia ka electoral roll kaba koit ba khiah bad ka bym don jingbakla” ong u Dr Tiwari.

Halor ki kot ki sla, ula kdew ia saw jait ki nongthep vote.

“Ha ka por lum kyrteng, ka jinglum thup ia ki Iing, ym donkam tam ia ki kot ki sla hynrei ki don saw jait na ki nongthep vote-kito ki kyrteng kiba la register ha ka voter list u snem 2005, kine ki nongthep vote kin hap ban aiti tang ia ki bynta kiba donkam jong utei u snem jong ka voter list ha ryngkat ka phorm pynrung kyrteng” ula ong.

“Kawei pat ka long ba kito ki kyrteng kiba shem ha ka voter list 2005 bad kiba la kha ha India hashuwa ka 1 tarik Naitung, 1987, kine ki nongthep vote kin hap ban upload ban aiti ia ki kot ki sla jong ki hi ha ryngkat bad ka phom pynrung kyrteng. Ki don 11 tylli ki kot ki sla, ia kiba ka thup jong ki la ai da ka ECI” ula bynrap.

“Ia kito kiba kha hapdeng ka 1 tarik Naitung 1987 bad 2 tarik Nohprah, 2004 “kiba ki kyrteng ka Kmie bad u Kpa kim pat shym la pynrung ha ka voter list, kine ki nongthep vote kin hap upload ia katto katne ki kot ki sla jong ki hi lem bad ki kot ki sla jong ki Kmie ne Kpa ha ryngkat bad ka phom pynrung kyrteng”.

Kiba saw ki kynthup ia ki nongthep vote “kiba la kha hadien u Nohprah 2004 bad kiba ki kyrteng ka Kmie bad Kpa kim pat rung ha ka voter list jong utei u snem, kine ki nongthep vote ki hap ban upload bad aiti ia ki kot ki sla jong ki hi, ki kot ki sla ka Kmie, ki kot ki sla u Kpa ha rngkat bad ka phom pynrung kyrteng” ong u Dr Tiwari.