Aizawl, Nailur 30 : Ka jingpang African Swine Fever (ASF) ka dang iai bteng ban wanrah jingeh ia ki nongri jingri (sniang) hapoh Mizoram ha kaba haduh palat 44,300 tylli ki sniang kynthup ia ki sniang khun kila iap tang ha kine ki 18 bnai ba la dep, kata naduh u bnai Lber jong ka snem ba la dep, ong ka khubor heh sorkar hynnin ka sngi Palei.
Na ka liang u joint director (Livestock Health) jong ka tnat animal husbandry and veterinary department ka jylla u Dr. Lalhmingthanga ula ong ba ka jingsaphriang jong kane ka jingpang mynta la shim ba ka dei kaba don tang ha ki katto katne ki jaka namar ka dei kaba la saphriang nyngkong sha ki sniang khlaw.
Watla kane ka jingsaphriang jong kane ka jingpang ka pyni ia ka dak ka jinghiar, hynrei ka lah pat ban kiew biang ha kano kano ka por namar la shim ba ka dei kaba iabit lyngba ki sniang bad saphriang sha ki sniang khlaw,” ula ong shuh shuh.
Ha u bnai Naitung ba la dep, ia ki sniang khlaw ba la iap la lapdien na ki jaka khlaw ha ki bynta jong ka Champhai district ha ka thain mihngi ka jylla ha ki bynta khappud ka Myanmar.
Hadien na ka liang ka National Institute of High-Security Animal Diseases ha Bhopal kala pynthikna ba kine ki sniang khlaw kila iap namar ka jingpang ASF.
U Lalhmingthanga ula ong ba ka jingsaphriang jong kane ka jingpag ASF nyngkong eh kala sdang napoh kawei ka shnong kaba don ha pajih hapoh Lunglei district ha ka thain shathie ka jylla ha khappud bad ka Bangladesh ha kaba la shim ruh ba kadei ka bym da ktah jur haba ym don ka jingiap jong ki sniang namar kane ka jingpang ha u bnai Nohprah jong u snem ba la dep.
Hynrei kane ka jingpang kala mih paw bad saphriang biang hajan kaba kut jong u bnai Rymphang, bad naduh katei ka por haduh kumba 10,892 ki sniang kynthup ia ki sniang khun kila iap ha katei ka snem.Sa kumba 30 tylli shuh shuh ki sniang kila iap na ka jingpang ASF hynnin ka sngi Palei, ula ong shuh shuh.
Naduh u bnai Rynphang haduh ka 29 tarik u Nailur mynta ka snem, ka tnat animal husbandry and veterinary department kala pyniap noh haduh kumba 9,887 tylli ki sniang kynthup ia kiba rit khnang ban khanglad na ka jingsaphriang shuh shuh jong kane ka jingpang.
Katkum une u heh sorkar la ong ruh ba kane ka jingpang ASF mynta kala ktah ia kumba 149 tylli ki shnong ha baroh ki khatwei tylli ki district ka jylla.
