Dibrugarh, Risaw 27: Ym duna ia ka 30 tylli ki pyrton ki Central Armed Police Forces (CAPF) la buh ha kylleng ki lai tylli ki District ka Arunachal Pradesh ban pynneh ia ka suk ka sain hapdeng ka jingiakhih pyrshah ia ka jingthmu ban pyntreikam ia ka Siang Upper Multipurpose Project (SUMP) kaba 11,200 MW.
U Inspector General (Central Zone) ka Arunachal u Hibu Tamang u la ïathuh ba ki briew na ki pulit ma ka CRPF, ITBP, SSB, Rapid Action Force (RAF) bad ki pulit kynthei ki la don ha ki District kiba la shah ktah.Ha Pasighat ruh la don lai tylli ki Battalion jong ki Pulit ka Assam, u la ong.
U Tamang u la ong ba ka sorkar ka long kaba la pynkhreh ban iakren bad ki longiing kiba shah ktah bad ka kloi ban weng ia ki jingeh jong ki halor kane ka projek ba la tyrwa.Katba ki don ki nongshong shnong kiba la iasoi ia ka memorandums of understanding (MoUs) na ka bynta ka pre-feasibility report ba lah ban leh (PFR), kiwei pat ki pyrshah ia katei ka jingleh.
“Ki don ki trai shnong kiba mynjur ia ka jingpule PFR, katba don pat kiba pyrshah, ki kynthoh ba lada kim kwah ia ka dam, kam donkam ia ka jingpule”, la ong u Tamang.
U la ong ba ki jingeh ha ka ain bad ka suk ka sain ki la mih wat shwa ban sdang ia ka kam survey, da kaba kdew sha ki jingjia ha ka 23 tarik u Risaw ha kaba la kynnoh ba la pynjulor ia ki mar ki mata jong ki paidbah.
“Ki don ki samla, khlem ki nongialam, kiba la sdang ia ka huri hura ha ka suk ka sain ha Pasighat bad pynjulor ia ki mar ki mata jong ki paidbah”, u la ong.
Katkum u Tamang, ki pulit ki la register 8 tylli ki case ha Pasighat bad ki la kem 21 ngut ki briew kiba donkti ha kane ka kam pynjot.Katto katne ngut kiwei pat ki la shah kem, bad ki jingkem shuh ki lah ban bud katkum ka ain, u la bynrap.
Ki jingiakhih ki la ktah ia ki distrik Upper Siang, Siang bad East Siang, ha kaba ki bynta jong ki nongshong shnong ki la pyrshah ia katei ka projek ba la thmu bad ia ka rukom jurip ba nyngkong.
Kane ka projek ba la thmu ban shna 11,200 MW ka la pynmih ïa ka jingpyrshah kaba jur bha khamtam ha ka distrik Upper Siang, ha kaba ki jingïakhih ki la nang kiew sha ka jingïakynad ha u bnai Risaw.Ki nongiakhih kiba pyrshah ia katei ka projek, la kynnoh ba ki la thang ia ka kali pulit bad thombor ia ki pulit, kaba la pynlong ia ki ban kem bad khanglad ia ki jingialang paidbah.
Ka jingkulmar ka long hadien ki taiew jong ki jingïakhih pyrshah ïa ka kam jurip ne ka (preliminary survey work), kaba pynpaw ïa ka jingsngewkhia hapdeng ki nongshong shnong shaphang ka jingktah kaba lah ban mih na ka projek ïa ka jaka, ka kamai kajih bad ia ka kolshor jong ki.
