Shillong, Jymmang 15: Ka Drug Reduction, Elimination and Action Mission (DREAM) kan sa buh ia ki Detoxification Centre ha man la ki Civil Hospital bad sa 8 tylli ki Rehabilitation Centre ha kine ki 6 bnai kiban wan, la ong u Mission Director u Bah Francis Kharshiing hynne ka sngi Palei, hadien jong ka jingialang kaba la lum da u Myntri Rangbah ka jylla u Conrad K Sangma.
“U Myntri Rangbah ka jylla jong ngi u long u nongialam uba tbit bad uba pynleit jingmut ha ki mat kiba lah ban treikam. Ngi lah pyni ia ki katto katne ki jingtyrwa bad ia ki sienjam kiba ngi lah ban shim. Ula iaroh ia ki kam kiba ngi lah leh haduh mynta bad ula buh ruh ia ka thong na ka bynta ka jong ngi, kynthup ia ka jingpyniaid ia ka App” la ong u Bah Kharshiing haba iakren bad ki nongthoh khubor.
Ula ong, ba u Myntri Rangbah ula buh ia ka por ban pyniar ia ki jingdonkam ha kylleng ki district. “Ha kiba bun ki district jong ka jylla, ula buh ia ka por ban na ka bynta ban tei ia ki Rehabilitation Centre. Ngi dang trei ia ka kam halor katei ka bynta” ula ong.
Naduh ba la sdang ia ka DREAM Mission ha u snem 2023, 4 tylli ki Rehabilitation Centre kila sdang treikam.
“Ngi la lah ban iaid shakhmat bha. Naduh ba la sdang ia ka DREAM Mission ha u 2023, ngi la buh ia ki 4 tylli ki Rehabilitation Centre. Ha ki por ban wan, hapoh jong ka 6 bnai, ngi khmih lynti ba sa 8 tylli ki Rehab Centre kin sa mih” la ong u Bah Kharshiing.
Haba batai pat halor kiwei pat ki jingthmu, ula ong “Ngi dang peit ban tei ia ki Detox Centre ha man la ki Civil Hospital ha kylleng jong ki District bad ngi dang trei ruh halor ki katto katne kiwei pat ki projek” ong u Bah Kharshiing da kaba pynpaw ba ka jingiashimbynta lang ka imlang sahlang kala long kaba biang bha.
“Kala don ka jingshimkhia lang. Hynin ka sngi, nga la lum ia ka jingialang bad baroh ki Rangbah Shnong ha West Khasi Hills bad nga dap da ka jingkyndit ba palat 200 ngut kila wan ban iashimbynta. Kane ka pyni ba mynta kila shaniah ia ka kam kaba ngi trei bad ka jingiakren bad jingiatai ruh kala long kaba sngewtynnad bha. Tad lada ngim donlang ia ka imlang sahlang bad ngi, ngi ngin ym lah ban pynbeit ia katei ka jingeh” ula ong.
Ula bynrap ba ka Mission kan sa pynlong ruh ia ka jingialam jngohkai ia ki samla kiba la shah ktah.
“Kawei na ki rai kaba ngi lah shim mynta ka sngi, kadei ban ialam jngohkai ia ki khynnah kiba la iehnoh shiteng por ia ka jingpule ha ki skul. Ngi kwah ban kyrshan ia ki ban ioh jinghikai pyntbit ha ITI Don Bosco Technical School,” la ong u Bah Kharshiing.
 kan sa buh ia ki Detoxification Centre ha man la ki Civil Hospital bad sa 8 tylli ki Rehabilitation Centre ha kine ki 6 bnai kiban wan, la ong u Mission Director u Bah Francis Kharshiing hynne ka sngi Palei, hadien jong ka jingialang kaba la lum da u Myntri Rangbah ka jylla u Conrad K Sangma.){kind=link}