Shillong, Jymmang 15 : Uwei u rangbah Bah Netnobiweit Khongsdoh ba na Pynter, ula mudui ejahar ha Sadar Police Station, Shillong ha ka sngi Palei, ba kynnoh ba u Khun jong u, ula shah bom haduh ban da poi sha ka jingiap ha u Rangbah Shnong Bah Fullmoon Khongsdoh lem bad ki dkhot ka Village Defence Party ka shnong Pynter, kaba hap hapoh ka Pynursla Police Station, East Khasi Hills.
Une u Khun ba shah bom haduh ka jingiap u kyrteng u Trophimos Khongmawloh. Kat kum ka ejahar,la kynnoh ba kine ki nongkitkam snong kila leh ia kane ka kam hapoh ka Dorbar Hall jong ka shnong Pynter ha ka miet 7 tarik Iaiong, 2026.
U Kpa ula kynnoh ruh ba hadien kane ka jingbom, kine ki nongialam shnong kila set ia u khun jong u hapoh ka borni haduh ka sngi kaba bud, tad haduh ban leit buh ia u sha Iing. Ia ka met la tep ha ka 9 tarik Iaiong bad ym shym la shah satia ia u Kpa ba un leit peit khatduh iala u jong u Khun.
Ha ka ejahar, u Kpa u iathuh ba ki nongkitkam shnong kila pyntip sha u ba u Khun jong u, ula khlad hadien ka jingdih bih. Hynrei hadien ba peit ia ki video kiba la ioh ring ha ka por ba kine ki nongialam shnong kila bom la tied ia u Khun , u Kpa um shym la ngeit shuh ia kane ka jingkam bad kynnoh ba ka rukom shoh ia u Khun jong u ka long kaba la ishyrkhei bha.
Ula pyntip ruh b aka daw ba u pynslem ban ujor ia ka ejahar ka dei namar ba u dang pyrshang ban wad ia ki jingshisha ha kine ki khyndiat sngi bala leit.
Ki Pulit kila register case hapoh ka kyndon 127(2), 103(1), 238 and 3(5) jong ka BNS halor kane ka ejahar bad ka jingtohkit mynta kala iaid shakhmat.
