Shillong, Jymmang 15 : U President ka Congress ha Jylla Bah MP barim ka Shillong Bah Vincent H Pala, ha ka sngi Palei ula pyntip ba ka party kala rai ia ka kyrteng jong u kum u kyrtong ha ka elekshon shiteng samoi ban wan jong ka Shillong Lok Sabha, haha bynrap ba u dang ap mynta satang ia ka jingpynbna na Delhi.
U Bah Pala uba long MP haduh lai samoi bad shah pynliem ha u (L) Dr Ricky AJ Syngkon jongka VPP, da 3.7 lak vote ha u snem 2024, ula kyrpad ia ki nongthep vote ka ri-lum Khasi Jaintia ba kin kyrshan biang ia u, haba kdew ia ka jingtreikam jong u ba 15 snem ha Parliament bad ka jingwanrah ia ki kam pynroi.
“Kala long final. Ngi ap satang ia ka jingpynbna na Delhi. Lada ki sngewbha ia nga, kin sa pynbna paidbah. Lada kim sngewbha, kin sa pan ia kiwei pat ki kyrteng. Hynrei kumba ka long, kala dei kaba kut bad nga kyrpad ia ki paidbah ba kin kyrshan beit ia nga” ong u Bah Pala haba iakren bad ki nongthoh khubor.
Ula ong ba ka Congress klaa rai pyrshah ban pynieng kyrtong kiba shu tan nabar ha kane ka kynti. “La jan arsnem shiteng nga la don shabar jong ka bor, bad nga la lah ban pynleit jingmut ha ki kam shimet jong nga. Mynta ka kynti, ka party kala rai ba ngim dei ban shu wanrah ia kibriew ban pynieng elekshon. Ym kum kiwei ki part kiba duna kyrtong napoh iing bad khot ia ki briew na shawei tang ban iakhun elekshon. Ngin ym leh satia ia kata” ula ong.
Haba kren halor ki kam ba ula leh ha Parliament, ula ong “Lada phi peit ia ka jingtreikam jong nga ha Parliament, Ngam ju kren than shaphang ialade, hynrei nga tharai ka por kala poi ban iathuh ia ki paidbah. Kala don ha ka rynsan paidbah. Ka jingleit parliament jong nga ka pyni ba nga la shimkhia hok shisha-92% haba ianujor sha ka 60-67 jong kiwei”.
Ula pyntip ba un sa thep ia ki kam ba ula leh ha ki rynsan paidbah khnang ba kin ai jingkynthoh.
Ula bynrap “Haba phai sha ka jingiashimbynta jong nga hapoh Iingdorbar, Nga la rah palat 260 tylli ki jingkylli, haba ianujor ba tang 18 lane 19 da kiwei. Ngam ju pynmih khubor ha ki social media. Haba phai sha ka jingthaw Ain, Nga la wanrah ia ka Bill ban iada bad pynneh pynsah iaka Sixth Schedule. Nga la wanrah ruh ia ka Bill halor ka kam tih dewiong, ka Bill ban pynrung ia ka ktien Khasi bad Garo ha ka khyrnit ba phra, bad ka Bill ban iada ia ki nongbylla iing. Nga la wanrah shibun ki Bill. Ym don mano mano ruh ba leh ia kata. Watla katta ki briew ki ong ba u Pala u khlem leh eiei”.
Haba batai ia ki jingioh ia ki jingtei ha ka por ka jinglong MP jong u, u Bah Pala ula ong “Ha ka por ba nga long MP, ngim pat don satia ia ka Kad Liengsuin. Mynta, ngi don ia ka kad liengsuin kaba itynnad bha. Pyrkhat phi, lada ngam shym don hangtei, ban leit nangne sha ri-lum Garo phin dang hap ban iaid lyngba ka Assam. Hynrei mynta kala don ka surok na Shillong sha Tura lyngba ka Nongstoin. Ka Nongstoin mynta kala iasoh sha Rambrai, Wahkajia bad wat sha Wahblei. Ka West Khasi Hills kala kham biang ha ba phai sha ki lad pyniasoh bad ia kaba mynshuwa”.
Ula ong ruh “Ngi la ioh iala ka jong ka passport office hangne mynta. La kyntiew kyrdan ia ka NEIGRIHMS. Ha NEHU, ki don tang katto katne ki deprtment mynshuwa hynrei hadien ba nga long MP, ngi la pynbun ia ka jingdon ki Department. Nalor kine, nga la pynleit jingmut ruh ha ka iohkam iohjam”.
U Bah Pala ula pynkut “Nga kyrmen ba ki paidbah kin wanphai biang sha ka Congress bad ngin iai bteng ban leh ia ki kam kiba ngi la leh hashuwa”.
