Shillong, Jymmang 14 : Ka Director General of Police (DGP) kong Idashisha Nongrang ha ka sngi Palei, kala pyntip ba ka Tnad Pulit kala phah ia ka kynhun SF-10 bad artylli pyrton ka Meghalaya Battalion sha shnong Lapangap, West Jaintia Hills bad haba bynrap ba ka Tnad ka dang pyrkhat ruh ban buh ia ka len Pulit ha ka thain hadien ba ka Assam kala buh iala ka jing ka len hadien ba mih ka jingiakynad.
Kane ka jingpynbna ka mih hadien ka jingwan tur ban iakhih ki paid Lapangap sha Secretariat ha ka sngi Balang, ha kaba kila dawa ban ai ia ka bor pahara ia ki nongrep, kiba la mad iaka jingshah jynrat ki jingthung jingtep ha ka por mynmiet ha ka kynhun kiba dei na Karbi Anglong.
Ka kong Nongrang ka iathuh ba kane ka jingphah bor pahara ka dei kaba la shim rai ha ka jingialang bala pynlong da u Symbud Myntri Rangbah, ia kaba ka Tnad Pulit kala ai ka jingkyrshan.
“……ha ka por ba mih nyngkong kane ka jingiakynad, ngi la phah ia ki SF-10 jong ngi. Ki kwah ia ka jingdon ka kynhun SF-10 ha ka thain” kala ong bad bynrap “Ki (SF-10) la hiar mynta ka sngi bad kila dei ban poi mynta namar kila mihdang step bha”.
Halor ka jingdon briew, ka DGP kala ong “Ka pyrton ia mynta bad ngin sa peit kat kum ka jinglong jingman, ngin sa peit la ngi donkam ban phah shuh shuh ia ki briew ne em”.
Kala pynthikna ba ki ar pyrton jong ka Meghalaya Battalion kila hiar haba sdang jong kane ka taiew. “Dang mynshisngi ruh, ngi la dep phah ia ar pyrton ki pulit ka Meghalaya Battalion sha katei ka jaka”.
Ka kong Nongrang kala ban jur ba ka jingdonkam ban phah briew shuh shuh kan shong eh ha ka jinglong jingman. “Kan shong eh ha ka jinglong jingman. Haba ngi phah na ka bynta ban tehlakam ia ka suk ka sain, ka shong baroh na kaei kaba jia. Ka dei ka kam kaba kylla, ngi hap ban peit thuk man ka khyllipmat” kala ong.
Halor ka jingdawa ki nongshongshnong ia ka Police Outpost, ka DGP kala ong ba ka Meghalaya kan sa shong pyrkhat ban buh ia ka len pulit, haba pynpaw ba ka Assam kala dep leh ia kane.
“Kumba phi tip ba ka Assam kala pynbor ba ngi dei ban bat ia ka status quo. Kumta, katba ialade kila buh ia ki, kaba iasyriem kum ka len. Kumta, haba peitthuh ia ka jinglong jingman, ngi ruh ngin sa khmih, ngin sa buh ia ka len” ong ka kong Nongrang.
Kala kdew ba ka Barato Outpost kaba dang shu plie ha ka sngi Saitjain, ka don kumba 16-19 kilometer na Lapangap.
Ka DGP kala mynjur ia ki jingpynsngew jong ki paidbah ba wan iakhih ha ka sngi Balang.
“Ki paidbah ka Lapangap kila wan hynnin ka sngi. Kiba wan kila bun bha. Ki Ophisar jong nga kiba don sha surok kila pyntip ba bun na ki nongshongshnong ka Lapangap kila iamih hynnin ka sngi” kala ong.
“Ka dei ka jingeh kaba dei hok shisha ia ki. Kila iai ong ba katba na ka liang ka Assam kam shym la khang ia ki ban leit rep hynrei kaei kaba jia, kila leit rep ha ka por mynsngi bad ha ka por miet, kat kaba ki thung, kila shah jynrat lut. Kane ka dei ka jingeh kaba kila iakynduh shisha bad kila ong ba kim shym la ioh satia ia ka jingkyrshan lem na ngi bad ngi la pyrshang hi kat kaba lah” bynrap ka kong Nongrang.
 kong Idashisha Nongrang ha ka sngi Palei, kala pyntip ba ka Tnad Pulit kala phah ia ka kynhun SF-10 bad artylli pyrton ka Meghalaya Battalion sha shnong Lapangap, West Jaintia Hills bad haba bynrap ba ka Tnad ka dang pyrkhat ruh ban buh ia ka len Pulit ha ka thain hadien ba ka Assam kala buh iala ka jing ka len hadien ba mih ka jingiakynad.){kind=link}