Shillong, Jymmang 14: U Samla Regeenal Shylla naka thain East Jaiñtia Hills District hynne ka step u la iaid kjat na khyrdop State Central Library shaduh Malki Football Ground ban dawa naka Sorkar Jylla ban shah noh iaki paidbah ban tih dewiong katkum ka juk Traditional Scientific Mining hapoh ka Jylla.
Haka jingshisha u samla Regeenal ula thmu ban pynlong daka jingiakhih daka ba shah thngan khlem pud sngi ha ha Madan Malki hynrei ki bor District kila wan pynsngew ba um ioh jingbit ban pynlong jingiakhih ha East Khasi Hills bad la bthah ia u ban pan jingbit na ki bor District ka East Jaintia Hills.
Naduh dangstep u samla Regeenal ula ieng ha khyrdop State Central Library ha ryngkat ka Pla Card ban pynsngew iaka jingeh ki paidbah namar ka jingshah khang ban tih dewiong hapoh ka Jylla khamtam ha rilum Jaintia Hills.
Haba kren shaki lad pathai khubor u samla Regeenal ula ong kane ka jingiakhih jong u kadei ban pynsngew shaka Sorkar Jylla ban wanrah iaki ain ban tih dewiong kaba iahap katkum ka jinglong ka khyndew ka shyiap hapoh ka Jylla.
“Hoid nga mut ban shah thngan naduh mynta ka sngi hynrei ngam ioh jingbit. Hynrei kum u samla ba don ka jijgkitkhlieh naka bynta ka ri bad ka jaidbynriew nga kloi ban bynda iala ka jong ka jingim daka ba shah jingit hynrei kaba sngewsih ka long ba ngam ioh jingbit” la ong u samla Regeenal.
U la ong ba mynta ka sngi u khlem phong wat tang ki slipar ban pyni shaka Sorkar ba, katno ki paidbah ki jynjar, katno ki paidbah haka thain Jaintia Hills ki iap bad ki duk hynrei u Myntri Rangbah um lah ban iohi.
“Nga kwah ban pynpaw shaka Jylla baroh kawei haduh katno ki ba trei dewiong ki shem jingeh bad ngim tip sa katno ki paidbah kin iap thngan namar ka jingiai bteng ka jingkhang tih dewiong” ula ong.
