Shillong, Jymmang 14 : Ki Pulit ka Jylla kila ioh kem ia arngut ki briew kiba dei na Cachar District ka Assam bad ioh kurup haduh 30,000 ki detonator bomb na ka kali na Umkiang, East Jaintia Hills ha ka 13 tarik Jymmang, ong u Superintendent of Police Pankaj Kumar Rasgania ha ka sngi Palei.
Kane ka jingkem kala wan jia ha ka por ba dang iaid ka jingtalasi kali ha ka por 2:30 baje mynstep. Ki Pulit ka Umkiang Police Patrol Post kia ioh bat ia kine ki briew na kawei ka kali Hyundai Eon kaba dang leit sha Silchar.
U Rasgania u pyntip ba ha ka jingtalasi ia ka kali, ki Pulit kila ioh kurup ia bun bah ki detonator bala buhrieh hapoh ka kali.
“Ka jingkhynra kaba bniah bha ia ka kali kala lam sha ka jingioh kurup haduh 30,000 ki detonator bomb. Ia kine ki detonator la buhrieh hapoh ki artylli ki synduk bad kawei ka pla” ong u Rasgania.
Ki Pulit kila kem noh ia ki briew kiba don hapoh ban pynlong ia ka jingtohkit. Kine ki arngut ki kyrteng u Kamrul Ali Laskar uba dei na Jamalpur, Cachar, Assam bad u Ibrahim Uddin Laskar uba dei na Loknathpur, Cachar, Assam.
Ki Pulit kila register case ia kine ki arngut ha Lumshnong Police Station hapoh ki kyndon ka Explosive Substance Act bad ka jingtohkit kala iaidshakhmat ban lapdien ia ka thymmei ba ioh ia kine ki detonator bad ki nongpdiang ia ki.
