Dawa ka HYC ia ka NTA ban pynlait ia ki samla pule ka Meghalaya, NE na ka rai pynsangeh ia ka eksam NEET UG-2026

Shillong, Jymmang 13: Ka Hynniewtrep Youth’ Council (HYC) kala aiti da ka jingthoh sha ka National Testing Agency ba kan pyrkhat biang ia ka jingpynsangeh ba treikam solansor ia ka eksamin NEET UG 2026 haba dawa ba dei ban pyllait noh ia ki samla pule ka jylla Meghalaya bad ia ka thain Shatei Lam Mihngi ka ri na kane ka rai.

Ha ka shithi kaba la phah sha u Director General ka NTA, ka HYC kala pynpaw ia ka jingsngewkhia bad ka jingbynniaw halor ka jingshim rai ban pynsangeh solansar noh ia ka eksamin NEET UG 2026 ha kylleng jong ka ri hadien ba kala mih ka khubor ba kynnoh ba kala don ka jingleh thurmur bad ka jinglait tuh ki jingkylli ha ki katto katne ki thain.

“Watla ngi kyrshan pura ban leh da kaba tyngeh ia kano kano ka jingleh kaba bakla bad sniew ne ban iapein ia ka jinglong jingman jong ka eksamin hapoh ka ri, ngi burom eh hynrei ngi pynpaw pat ba ka jingrai ban pynsangeh salonsar ia ka eksamin kala wanrah ia ka jingeh kaba khraw, ka jingbym thikna bad ka jingktah ia ka bor pyrkhat pyrdain bad ka jingktah ia ka jinglut jingsep ia ki hajar ngut ki samla pule ka Meghalaya bad ka thain shatei lammihngi ka ri kiba la ialeh hok bad leh ha ka lynti kaba khuid ia katei ka eksamin” la ong ka HYC.

Haba pynpaw ia ki jingeh kiba mad da ka thain, ka HYC kala ong, “Ka Meghalaya kadei kaba don ha ka jaka kaba sha kyndong bad kaba duna ha ka ioh ka kot haba ianujor bad ki jylla kiba don ha ri thor” ha kaba ki samla pule ki hap ban shong kali jngai ha ki jaka kiba longriat bad ki hap ban pynlut bun ruh ia ka pisa na ka bynta ka leit ka wan ka jongki ban ioh leit thoh eksam bad ia ki kabu kaba ki ioh ha kaba iadei bad ka pule puthi.

Kala bynrap, ba bun ki samla pule kidei kiba wan na ki longiing longsem kiba duk, kiba na ka thain nongkyndong bad na ka jaidbynriew riewlum bad kiba bun hi na ki, “Ka NEET kadei shisien eh ka kabu ha ka jingim ka jongki ban ioh ban leit pule ha ka lain Medical bad ban kyntiew ia la ka longiing bad ia ka imlang sahlang”.

Ka HYC kala kdew ba kam shim la don kano kano ka kaiphod kaba thikna, ka jingujor ne ka jinglap kaban kdew ia ka jinglait tuh ki jingkylli, ka jingleh thurmur ne ka jingleh bym hok ha ki jaka thoh eksamin ha Meghalaya bad ha ka thain shatei lammihngi.

“Ki samla pule na Meghalaya bad na ka thain shatei lammihngi kim dei ban shah pynshitom ia ka jingleh thurmur ne jingleh bakla ha kiwei pat ki jaka kiba la jia hapoh ka ri, haba ym shim la don ruh ia kino kino ki sabut ba kiban kdew ba lah iapein ia ka rukom pynlong ia ka eksamin hapoh ka jylla” la pynapw ka HYC.

Kala pynpaw ban pynlong biang ia ka eksamin kan ktah jur ia ka ioh ka kot, ka jaka sah bad ia ka leit ka wan bad khamtam eh ia ka jingeh kaban mih na ka bynta ki samla pule bad ia ki kmie ki kpa na ka jylla Meghalaya, ia kaba bun hi kidei kiba la pynlut iala ka jingdon jingem ha ka leit ka wan, jaka sah, ban ioh jinghikai bad ban pynkhreh na ka bynta katei ka eksamin.

Nalor kane, kala pynpaw ba katei ka jingbym thikna kan ktah jur bhai a ki samla pule kiba wan na ki jaka kiba don sha jngai bad sha kyndong bha jong ka Meghalaya, ia kaba wat tang ban ioh ia ka jinghikai pyntbit ruh, ki kor digital kadei kaba ka lad ka duna bha ia ki ba kin ioh.

Ka HYC kala kyntu ia ka NTA ban bishar biang ia ka jingshim rai kyllum ka jongka halor ka jingpynsangeh noh ia ka eksamin bad ban pyllait noh ia ki samla pule jongka Meghalaya bad ia ka thain shatei lammihngi na kano kano ka jingthmu ban hap ban ialeh biang ia ka eksamin wat hapdeng ka jingbym lah ban pynshisha ba kala don ka jingleh thurmur ne leh thok hapoh ka jylla ne ha ka thain”.

Kala kyrpad ia ka NTA ba kan shim da ka sienjam da kaba phai sha ki thain ha ka jaka ban pynbna ban pynsangeh noh ha ka ri baroh kawei watla kam shim la don kano kano ka jingleh thok hynrei ban iada ia ka hok bad ia ka bha ka miat, ka lawei bad ia ka jinglong jingman jong ki samla pule kiba la leh hok bad leit thoh ia ka eksamin da ka lynti kaba khuid”.

“Ka HYC ka iengskhem ba ka long kaba kongsan bha ban pynneh pynsah ia ka jinglong hok ia ki eksamin hapoh ka ri, hynrei ka jingai ia ka hok bad ka jingbym leh shilliang ruh ka long kaba kongsan bha khnang ba ki samla pule riewlum na nongkyndong kin ym shah pynsajia ia kaei kaei kaba kim shim la leh” la pynpaw ha ka shithi bad ka kyrpad ban tuklar mardor bad ban don ruh ia ka rukom pyrkhat na ka bynta ki mynsiem briew kaban long na ka bynta ka bha ka miat, ka jingbym shah liang bad ka jingai ia ka hok”.