Shillong, Jymmang 11 : Ka Sorkar Jylla kan sa shong bisahr kam biang ha u bnai ban wan halor ka jingthmu pynkynriah ia ki 342 tylli ki longiing na Them Metor, Them Iew Mawlong, kynthup ka jingiapyrkhat halor ka lad ban pyndonkam ia ka jaka ki shipai.
Ia kane la pyntip da u Symbud Myntri Rangbah ba khmih ia ki kam Pynroi Sor Bah Sniawbhalang Dhar haba ong “Nga tharai lashem bnai ngin sa iashong jingialang biang halor kane ka kam. Ngin sa pyntip sha phi” ong u Bah Sniawbha haba jubab ia ka jingkylli halor ka jingiaid ki kam ba iadei bad kane ka jingtyrwa.
La ka Sorkar kan thied ia ka jaka shipai naka bynta ban shna iing ia kine ki longiing ka Them Metor, ula ong ba haduh mynta hi ym pat iashim satia ia kano kano ka rai.
“Ngin dang ban shim rai la ngi pyniaid shakhmat bad ka jaka ki shipai lada ki kloi ban ai ne la ngi pyniaid beit shakhmat ia ka kam kat kum ka blueprint bala dep pynkhreh kham hashuwa” ula ong “Ngin hap ban shim rai halor kane”.
Haba kylli la ka Defence Ministry kala ai jubab ia ka jingkyrpad ka Jylla, u bah Sniawbha ula ong ba ki Ophisar ki dangap ia ka khubor.
“Ki Ophisar jong nga kila iakren bad ki, kumta ngin dang ban ioh ia ka kaiphod na ki Ophisar ka Tnad Pynroi sor ia kaei ka khubor ba khatduh ba ki ioh na ka Ministry” ula ong .
Ka Sorkar Jylla kala wad ia bun ki lad ki lynti ban pynkynriah ia ki nongshongshnoong kaThem Metor kum shibynta n aka jingthmu ban pynkylluid iaka thain Them Iew Mawlong.
