Shillong, Jymmang 10: Kawei ka Iing dewbilat ba shimala kala pluh ha ka Sngi Saitjain hajan ka Lad Them Bijoy, harud ka surok ban kiew sha Motphran.
Kane ka jingjia kala jia ha ka poe 10 baje mynmiet bad ka dei ka iing kaba don marjan ka Ajmera Marbles.
Ki dukan kiba shah ktah namar ka jingpluh ding ki kynthup ka dukan Fast Food, ka dukan khap shniuh, ka dukan Dairy, bad ka dukan die mar khutia.
Marsien iohi ia ka jingsdang klang ka ding, ki briew kiba don ha dukan Dairy kila sei noh ia ki tyndong lyer shet (Cylinder) kiba don hapoh kine ki dukan bad mar mar kila khot iaka kali pynlip ding kaba don ha Lum Survey.
Ki kali pynlip duh mar mar kila poi sha kane ka jaka ban tem iaka ding bad iada ia kiwei pat ki dukan ba don marjan nalor ki iing briew.
La suba ba ka ding ka la sdang saphriang nyngkong na ka dukan Fast Food bad la suba ba kane ka lah ban dei na ka jingthud ka bording lane ka Short Circuit.
