Shillong, Jymmang 09 : Ka Chairperson ka Meghalaya State Commission for Protection of Child Rights Agatha K Sangma ha ka sngi Saitjain kala ong ba ki kam bret khun ka dei kaba donkam ia ka jingia pyrshang lang jong baroh ki kynhun ba don bynta, kynthup ki lad pathai khubor bad kala kyntu ia ki jinghikai bad pynsngewthuh ia ki khynnah kynthei ba dang rit.
Haba kren halor ka jingjia ba dang shen ba bret ia I Khunlung, ka Agatha kala ong ba ka Commission kala shimkhia bha ia kane ka kam.
“Na ka Commission ngi la shimkhia bha bad ka dkhot jong ngi kaba dei na Ri-Bhoi District, kala leit dalade bad iakynduh ia ki bahiing hasem” kala ong.
“Ka DPCU kala shimkhia, bad kala pynthikna ruh ia ka jingai jingiasyllok ia ka Kmie kaba la bret iala I Khun” kala ong.
Ka Agatha ka ong ba ki jingpynsngewthuh bad ka jingai jinghikai ki long kiba donkam ban lah tehlakam . “Kane ka dei ka kam kaba donkam ia ka jingiapyrshang lang na baroh ki liang kynthup ki lad pathaikhubor” kala ong.
Halor ka jingjia ha Ri-Bhoi, ka Agatha kala ong “Kane ka jingjia ka dei kaba kyrpang ha kaba ka Kmie kala kem tieng, kala tieng bad shim ia kato ka rai….ka long kaei kaei kaba sngewsih. Nga kyrmen ba ka rukom treikam ka sorkar kan kham kynthup lang khnang ba kin sngew iohbor ba kin lah ban shim ia ka rai”
Haba kylli la ka Commission kan nang shim shuh shuh ia ki sienjam, ka Agatha kala ong “Ia mynta, ngim pat rai satia. Kane ka dei kawei na ki jingjia kiba jia, hynrei lada ki nang iai jia, ngin hap ban leh eiei”.
Halor ka hukum ka High Court ba dang shen ba iadei bad ka jingiashongkha khynnah, ka Agatha kala ong “Ka High Court kala shimkhia bha iakane bad mynta iaki case Romeo-Juliet yn ym khein shuh kum ki case POCSO” kala ong.
“La ai mynta ia ka jingiasyllok ia ki shujur ki bym dei ki case POCSO namar ba ki dang dei kiba dang khynnah ka rta” kala ong.
