Shillong, Jymmang 08: U Symbud Myntri Rangbah ba khmih iaka tnat Transport Bah Sniawbhalang Dhar ha ka sngi Thohdieng, ula ong ba ka Sorkar kan nym leh daka bor haba iadei bad ka projek lynti Rel ha rilum Khasi-Jaiñtia, da kaba ban jur ba ka jingpyntreikam kan shong ha ka jingshim rai lang jong baroh ki nongiashim bynta.
Haba kylli shaphang ka jingthmu ban pynpoi lynti Rel ha rilum Khasi-Jaintia, u Bah Sniabhalang ula ong “Ngi dang ïakren bad ki kynhun kiba bynta. Dei na kata ka daw ba ka Sorkar kam don jingthmu ban leh daka bor. Ngi ju kynthup lang ïa baroh ha kano kano ka rai. Kane ka dei ka Sorkar jong u paidbah.”
U la pynthikna ba la thaw ia ka All Party Committee ha u snem ba la dep ban iakren ia kane ka mat.
“Hooid, la thaw ia ka Committee jong baroh ki seng sain pyrthei ha u snem ba la dep. Ka shim por. Ka lah ban donkam 10-15 tylli ki jingialang namar ngi donkam ban kynthup lang ia baroh haba shim ïa kano kano ka rai” u la ong.
Haba kylli, balei ba ka thain Garo Hills ka paw ba ka pdiang ia ka projek lynti rel, u Symbud Myntri u la ong, “Ki briew jong ngi ki iapher na kawei ka jaka sha kawei pat. Kumta donkam ban pynsngewthuh ïa baroh ki trai shnong. Dei na kata ka daw balei ba ka shim por. Man la ki projek thymmai ki shim por.”
Haba kylli hato ka Sorkar kan dang pynroi shuh shuh iaki lynti Rel ha Garo Hills, u la ong “To ngin sa peit”.
