Shillong, Jymmang 08 : Ki nongtrei bala shongthait jong ki skul bad college deficit ha Meghalaya kila lah mynta ban weng noh ialade na ka Centralised Provident Fund Scheme, 2026 bad ban sei noh ia baroh ka pisa ba kila kynshew.
Ia kane la pyntip da ka tnad Pule Puthi ka Jylla lyngba ka jingpynbna (notification) bala pynmih ha ka sngi Thohdieng.
Kane jingpynbna bala pynmih da u Commissioner & Secretary ka tnad Pule Puthi Vijay Kumar, kala mih hadien ba bun ki nongtrei bala shongthait jong ki skul bad college deficit, kila leit iakren ia ka Sorkar bad pan jingbit ban sei noh ia baroh ka pisa na ka CPF account namar ka jingeh ha ka pisa tyngka, ka jingsumar bad ka jingdonkam shimet.
“Ia ki nongtrei bala shongthait jong ki skul bad college deficit la shah ba kin weng noh ialade na ka Meghalaya Non-Government School and College Employees Centralised Provident Fund Scheme, 2026 bad ban sei 1005 ka pisa bala lang ha ki CPF account jong ki” ong ka jingpynbna.
Ka jingpyniaid ia ka kam ka donkam ia ka jingpynshisha da ka Directorate of School Education & Literacy na ka bynta ki nongtrei ki skul bad ka Directorate of Higher & Technical Education na ka bynta ki nongtrei college. Tad hadien bala ai jingbit, ka State Bank of India (SBI), Laitumkhrah Branch, kan lah ban pynlait ia ka pisa n aka Meghalaya Non-Government Teachers EPF Account.
Ban pynthikna ia ka jingmynjur, ka SBI kan hap ban aijingmut ia ki nongtrei bala shongthait halor ka jingkhein ia ka penshon ba man u bnai kaba lah ban lang hapoh kane ka skhim ba siew ia ka pisa bala buh (fixed sum) ha ka shisnem lada 50% na ka korpus la ai pat kum ka jingsiew pat (regular income) man ka por, bad batai ia ki jingeh ha ka liang ka pisa tyngka hadien habud lada jied ban mih noh na ka rukom ai penshon ba la pynshong nongrim ha kane ka rukom siew.
Ki nongtrei kin hap pat ban ai da ka jingthoh ba la dep pyntip pura sha ki halor ki jingmyntoi jong ka pension ba kin ioh, bad sngewthuh ia ki jingktah ka jingsei lut ia ka pisa bad ka jingrai ban mih noh na ka skhim.
Ka Sorkar kala pynshai ba “ki nongtrei kila jied ban kyntait ia ka CPF scheme hapoh kane ka jingpynbna kin nym lah shuh ban kam ia kino kino ki jingmyntoi hapoh kane ka skhim, lait noh satang ka pisa bala lang na ka jingkynshew shuwa ba kin mih noh na ka skhim”.
Ki Nongtrei jong ki skul bad college deficit kiba dang don ha ka kam, ki lah ruh ban mih noh na ka skhim bad “kynshew ha kiwei pat ki pension lane retirement scheme kaba ki mon hi dalade”.
Hadien ba ki weng noh, ia ka synniang CPF ba man u bnai “yn sa pynlait lang noh ha ryngkat ka tulop sha ka account tulop lane kiwei ki bank account kumba kwah da ki nongtrei”.
Ka Sorkar kala ong ba ia kane ka sienjam la shim na ka bynta ka jingleh bym lah shiliang, ka jingmynjur hadien ki jingbatai shai bad ka jinglong laitluid ha ka kam pisa tyngka jong ki nongtrei.
Ki nongtrei kiba iai neh bad ka skhim kin hap ban plie ia ka PRAN account bad ki SBI branch bala buh. Hadien bala pyndep ia ka jingphah lut bad sei ia ka pisa, ka Central CPF Acoount ha SBI laitumkhrah “yn sa khang noh bad kan nym don shuh kano kano ka jingpyniaid kam pisa lyngba kane ka account”.
