Shillong, Jymmang 08 : Ka Sorkar Jylla kala thung ia ka Commission of Inquiry hapoh u Justice (Retd) T.Vaiphei ban tohkit ia ka jingkulmar bad jingiaumsnam kaba khie ha ri-lum Garo ha ka por ba leit thep kyrteng ki kyrtong na ka bynta ka elekshon Garo Hills Autonomous District Council (GHADC) myn ha ka 9 tarik Lber, 2026.
Ka jingpynbna, bala pynmih da u Chief Secretary Dr Shakhil Ahammed, ka ong ba kane ka rai ka mih hadien ki khubor ba ioh pdiang haba iadei bad ki jingkulmar bad ka jinglam sha ki jingumsnam ha ri-lum Garo, kaba poi sha u pud ka jingiap briew bad ka jingjulor ki jingdon jingem.
Haba pyntreikam ia ka kyndon 3 jong ka Commission of Inquiry Act, 1952, u Lat ka Jylla ula tynrong ha ka Commission ba kan tohkit ia kiei ki daw ba lam sha ka jingjia ba 9 tarik Lber ha West Garo Hills bad ban aiti ia ka kaiphod ba bniah halor ki jingshem ia ki kam lane jingleh bakla jong ki briew bad ki bor ba dei khmih, “kynthup ka jingbym lah ban khanglad ban jia kine ki jingjia”.
Ka Commission kan shong bishar ruh ia ki daw tynrai jong kane ka jingkulmar, ai jingmut ia ki lad ban pynbeit bad ka jing pynkylla ia ka rukom trei ban tehlakam ba kan nym jia shuh, bad ai jingmut ia ki sienjam kiba dei ban leh, kynthup ka jing ai jingiarap song pisa ia kito kiba la mad ia ki jingduh ki jingdon jingem lane ka jingim namar ki jingkulmar.
Ka Commission kala ioh hynriew bnai naduh ba pynmih ia ka jingpynbna ba kan aiti ia ka kaiphod jingshem bad ki jingai jingmut sha ka Sorkar Jylla.
Ki jingkhot bishar jong ka Commission kan long ha Tura laitnoh lad aka Commission ka shim rai da kumwei pat.
Ka jingpynbna ka bynrap ruh ba ka Commission kan pynwandur iala ka jong ka rukom treikam bad ka lah ban pan ia ka jingiarap na ki Ophisar, ki riew shemphang ne kino kino ki bor lada donkam.
Ka kyndon jong ka Commission of Inqury Act ba aibor ia ki civil court, la pyntreikam lang ha kane ka jingtohkit.
Ia ka jinglut jingsep jong ka Commission yn hap ban siew da u Commissioner of Division, Garo Hills, ong ka hukum.
 T.Vaiphei ban tohkit ia ka jingkulmar bad jingiaumsnam kaba khie ha ri-lum Garo ha ka por ba leit thep kyrteng ki kyrtong na ka bynta ka elekshon Garo Hills Autonomous District Council (GHADC) myn ha ka 9 tarik Lber, 2026.){kind=link}