Shillong, Jymmang 07: U Symbud Myntri Rangbah ka Jylla u Bah Prestone Tynsong u la iada ia ka rai ban phah ia ki nonghikai ban leit lum khana samari (Census) da kaba ong ba haka wat ba nyngkong (Phase I) kan donkam tang 30 bad ki hap ban trei tang 2-4 kynta hadien ba la wai skul ha ryngkat ka jingsiew.
“Ha ka jingshisha, ka long kaba suk bha, namar haka Phase I, ngi la khein kan shim por tang 30 sngi iaki nonghikai ban leit sha kito ki shnong ba la mang” ong u Bah Prestone.
U Bah Prestone ula ong ba ka kam lum khana samari ka long kaba suk. “Kata ka 30 sngi ruh ka shong ha ki namar ki lah ban trei 2-3 ne 4 kynta hadien ba la wai skul, ki lah ban leit ryngkat bad ki Rangbah Shnong bad ki lah ban leit shaki 4-5 tylli ki longïing ha ka shisngi namar kane ka dei shaphang ka jingkheiñ jingdon briew” u la ong.
Halor ka jingkynnoh ba khia palat ka kam, u Symbud Myntri Rangbah ula ong “Ka Form kala don lypa ban pyndap, donkam ban batai sha ki nongshong shnong, ka long kaba suk bha, kumta ngi la dep kheiñ ba kam dei ka jingkit kaba khia hynrei nga dei ban ong ba kin ïoh jingmyntoi ruh ha ka liang ka pisa namar ngi la rai ban mang T.15,000-T.20,000 naka bynta 30 sngi kum ka jingsiew ban leh khana samari”.
U la pynshai ba ka jingphah lum khana samari ia ki nonghikai kadei kaba la bud ia ka rukom treikam. “Kumta ngam ïohi kano kano ka jingeh kumba long mynta namar kam dei tang na ka Sorkar Jylla ba ngi leh ïa kane, ïa kane la leh namar ba ki In-charge ophisar ki dei ki BDO jong ki block, kumta u BDO un sa pyndonkam ïa ki tang hadien ba la ïamir jingmut bad ki Rangbah Shnong, ka Managing Committee bad ka tnat ba dei peit” u la ong.
“Kumta shisien ba la pyndep iaki jingdonkam baroh, ka hukum ban phah lum khana samari kan sa sdang” ula ong.
 da kaba ong ba haka wat ba nyngkong (Phase I) kan donkam tang 30 bad ki hap ban trei tang 2-4 kynta hadien ba la wai skul ha ryngkat ka jingsiew.){kind=link}