Hakhmat palat 10,000 ki nongkyrshan, pynbna u CM ban jop ka NPP ha ka elekshon Shillong Lok Sabha

Ym don u kyrtong ba kham lah ia u Dr DRL Nonglait

Shillong, Jymmang 07 : Ka National People’s Party (NPP)ha ka sngi Thohdieng kala pynbna paidbah ia u President ka Khasi Author Society (KAS) Dr DRL Nonglait kum u kyrtong ka party na ka bynta ka elekshon shiteng samoi ka Shillong Lok Sabha bad u National President bad Myntri Rangbah ka Jylla Conrad K Sangma ula pynpaw ia ka jingsngewskhem ba ka party kan jop ha kane ka elekshon shiteng samoi.

Haba kren sha ki paid ba palat 10000 ngut ha ka jingialang pynbna kyrtong, u Conrad ula ong “Ngam tharai ba kiwei kiwei ki seng sain pyrthei kin ioh ia u kyrtong ba kham lah ban ia u Dr DRL Nonglait, u briew uba ngeit ba ka dei ki kam kiba kham kongsan, u briew uba leh ia kaei kaba kren, u briew uba la pynshisha ialade bad u briew ula ngeit ha ka ban pyniatylli ia ki briew jong ngi ym ban pyniapait iapra ia ki”.

“Bad mynta ka sngi lada ngi lah ban wanrah lang ia une u kyrtong bad kane ka party, nga ngeit ba kane ka dei ka khyllipmat bad nga tip ba da ka jingtrei shitom jong iwei pa iwei na ngi, ngin ioh ia ka jingop ha kane ka elekshon” ula ong.

“Ngin jop ia kane ka elekshon hynrei ia ngi ba ngin lah ban leh ia kata, ngim long ban shongthait, ngim lah ban duh noh wat shisngi bad man iwei pa iwei ba iashong hangne ngi hap ban long u nongtrei ba shisha jong ka party” ula bynrap.

Haba pdiang ia u Dr Nonglait sha ka NPP, u Conrad ula ong “Ka NPP ka don beit ia ka jingngeit ba ngi dei ban iaid iala ka khyndew ka shyiap da ki kam ym tang da ki ktien”.

Ula ai khublei ia u Dr Nonglait halor ki synniang ba ula ai ban ai jingithuh ia ka Ktien ka thylliej.

“Khublei shibun ia phi Dr Nonglait namar jong phi, bad nga ban biang, namar jong phi bad ka Khasi Author Society bad ka Achik Society….Khublei ia phi Dr Nonglait namar ki jingpyrshang jong phi ba mynta ka ktien Khasi bad Garo kila dei ki Official Language ne ktien Sorkar ka Jylla” ula ong.

U Conrad ula pynpaw ia ka jingkmen ba ka jingwan iashimbynta ki paidbah ha kane ka jingialang kala long palat ia kaei kaba khmih lynti.

“Dang shu pyntip ia nga da u Working President Bah Hamletson Dohling…u ong Sir ngi la pynkhreh ia kane ka jaka bad pynbeit ia ka jingwan briew kumba 3000 ngut hynrei ngi la khein mynta ba ki don pynban kumba 10,000 ngut ki briew kiba la wan hangne mynta ka sngi….ka khubor kaba don ka long ia ka jingioh jingkyrshan ba ngi iohi mynta ka sngi na ka bynta ka jinglong kyrtong u Dr DRL Nonglait bad na ka bynta ka NPP hi ka long kaba ai mynsiem shisha” ong u Conrad.

Ula pynpaw ba ka NPP hi ka ieng shajngai bha na ka kam sain pyrthei kaban pyniapait iapra.

“Katba ki don ki seng sain pyrthei kiba iakhun dohiap ban phiah ia ka Jylla bad leh ia ka sain pyrthei ba pyniapait iapram…hangne ka don ka seng sain pyrtheikaba ngeit ha ka jinglong para briew, kaba ngeit ha ka jingieid ia baroh ki Jaidbynriew, kaba ngeit ha ka jingpyniatylli ia ki briew jong ngi bad ban ialam shakhmat ia ka Jylla ha ka lynti jong ka roi ka par” ula ong.

Halor ka profile u Dr Nonglait, u Conrad ula ong “Nga sngew burom shisha ba mynta ka sngi ngi la lah ban pdiang ia u briew shimet, u briew, u rangbah u bym donkam ban pynithuh, nalor ba long napdeng ki top ten professor hapdeng ki Khasi ha Meghalaya, nalor ba don ha ka Khasi Author Society la palat 22 snem bad long President ia palat 12 snem….u Dr Nonglait ha ka shikyntien u dei u briew uba im palei bad ba sngewrit, uba ieid ia ki paidbah bad uba ieid ia ka Jylla”.

“ U Dr Nonglait ula buh ia ka nuksa ka jingaiti lut, ka jingbym kynran dien, ka jingisih ia ki kam thombor bad pynshisha ba lada ki jingthmu jong ki ki dei kiba dei, lada ka mynsiem jong phi ka dei ha ka jaka kaba dei, bad ka jingkut jingmut jong phi ka bym lah ban pynkhih, ngin sa kynjoh ia ka thong jong ngi ha kawei ka sngi” ula ong.

U Conrad ula pyniapher ruh ia ka rukom treikam u Dr Nonglait bad ka sain pyrthei na surok.

“Ki don katto katne ki seng sain pyrthei kiba ngeit ha ka sain pyrthei na surok, kiba ngeit ha ka jingpynkha ia ki jingeh bad pynkha ia ki jingkulmar….u Dr Nonglait u ieng kum ka nuksa ban pyni ba kum u nongshongshnong kane ka Ri….Ngan kynjoh ia ka thong jong nga lyngba ka lynti ba jai jai, lyngba ka jingiakren bad lyngba ka lynti ka riti synshar” ong u Conrad.

Haba shim ia kane ka jinglong kyrtong kum ka “plan u Blei”, ula bynrap “Kaei kaba jia mynta ha kane ka khyllipmat ban sah khana ha ka histori, kam duna eiei ia ka jingthmu u Blei na ka bynta ka Shillong constiyuency, ka thain Ri-lum Khasi bad Jaintia, ka plan u Blei na ka bynta ka Parliament jong ngi, ka plan u Blei na ka bynta ka Jylla Meghalaya bad ka plan u Blei na ka bynta ka longiing jong ngi ka NPP”.

U Conrad ula ong ba ka kam kaba bud jong u Dr Nonglait mynta kan dei ha Parliament.

“Nga ngeit shisha ba ka rukom pyniaid u Dr Nonglait ia ka jhad ka lam sha ka jingpynbna ia ka ktien Khasi bad Garo um ka Official Language ka Jylla, nga ngeit ba ki kam jong u ki dang dep tang shiteng….ka dei ka plan u Blei ba dei lyngba u Dr Nonglait ban gin lah ban pyntyllun shakhmat ia ki jingdawa jong ngi sha kawei pat ka sienjam ha Parliament…bad pynthikna ba ka ktien Khasi bad Garo kan rung noh ha ka thup jong ka Khyrnit ba Phra ka Riti Synshar ka Ri” ula ong.

Ula pynksan ba u MP na ka liang synshar hi kan iarap bha ia ka Jylla.

“Ka jingiatreilang ryngkat ryngkat bad ka jingiatrei bad ka kynhun kaba dei na ka liang Synshar hi ka dei kaba iapher bha na kaba don ki nongmihkhmat kiba dei na ka Liang Pyrshah…Nga kyrpad ia ki paidbah ka ri-lum Khasi Jaintia, iarap ia ngi, iatrei bad ngi, khnang ban gin lah ban don ha ka kyrdan kaba khlain ha ryngkat bad ka Sorkar Pdeng jong ngi” ula ong.

Halor ka lynti iaid jong ka NPP, u Conrad ula ong ‘Ha kine ki 12-13 snem, ka party jong ngi kala nang khlain nang khlain ym namar jong kino kino ki riewshimet hynrei namar ha ka NPP, ngi dei ka longiing, ngi iatylli bad ngi pynthikna ba ngi buh ia ki briew jong ngi hakhmat ia ka jingmyntoi shimet, ha ngi hi ka dei ki kam jong ngi kiba kham kongsan”.

Ula kyntu ia ki nongtrei ka party ba kin long kiba don discipline ne ka akor ka burom. “ Ki don ki por ha ki seng sain pyrthei kaba ma ngi hi dalade ngi sdang ban iakdew kti iawei ia iwei….To ngin kiar ia kane bad to ngin pynthikna ba man ki kyntien kiba mih na shyntur jong ngi…ka dei ban long kaba pynsngewtynnad” ula ong.

Haba kyrpad ia ki nongtrei ka party ban trei khlem shongthait ha kine ki 90 snem ban wan lane tad haduh ba pynlong ia ka elekshon, u Conrad ula ong ba ka long kaba donkam ban pynthikna ba ki buit treikam kin don ha ki nongtrei ha man la ki shnong ki thaw….ban pynthikna ba kane ka jingialap elekshon kan long ka jingialap ba pura jong ki nongtrei ha manla kawei pa kawei ka shnong bad ki Polling Station”.

Kiba la iadonlang ha kane ka prokram ki kynthup ia ki Symbud Myntri Rangbah- Bah Prestone Tynsong bad Bah Sniawbhalang Dhar, ki Myntri Sorkar, MLA, MDC, ki Nongiala ka party nalor kiwei kiwei.