Shillong, Jymmang 06 : Ka Amlarem SC ka la lah ba kan pynliem ia ka Champion jong u snem bala lah ka Mawlai SC, da 2-1, ha ka jingiakhun jong ka Group C ka lympung 5th Meghalaya State League, ha kaba kane ka nam rem lah pat ban ong ba kam don jingktah satia ia kane ka kynhun, kaba la dep ba kan pyntikna lypa pat ialade sha ka wat iakhun jong ka Rd-16.
U namtam ha kane ka jingiakhun dei u Wantiwjune Buam uba la lah ban lam khmat ia ka Amlarem SC ban thep ia ki artylli ki kol ha ka 1 minit bad kaba 76, katba ia ka shi kol ka Mawlai SC la thep ia ka da u Batskhemlang Thongnirit ha ka minit kaba 15.
Kumta da kane ka jingjop, ka Amlarem SC joit kan kiew sha ka kyrdan kaba ar hadien ba ka la ioh ba kan khur pura 10 point, katba ka Mawlai SC kan iai neh halor duh ka miej hadien ba ka la ioh ba kan hur 13 point.
Ha ka jingiakhun hapoh Mawkyrwat, ka lahduh u snem 2023 ka Rangdajied United FC ka la mad pat ia ka namrem kaba ar ka jong ka ha kane ka lympung iakhun, kaba ha kane ka kynti kaba mynta kan shah liem noh da 1-0 hakhmat ka Mawten SC, ia kane ka shi kol la thep ia ka da u Lastbornson Marwein ha ka minit ba 12 ha ka jingiakhun ka Group H.
Ha kaba kut, na kane ka Group don lai tylli ki team kiba ioh ban ia khur mar 8 point katta ka Rangdajied, Mawten bad ka Seng Samla Umdang Pyllun, ha kaba ia ka rai jong kine baroh kan shong pat ha ka Tournament Committee ka MFA.
Haba phai pat sha ka jingiakhun ka Group A ba la long ha SSA Stadium, Polo, ka Khimusniang SC ka la lah ba kan ieng iakhun tyngeh tad haduh ba kan da iakhaid da mar shi kol bad ka kynhun ialehkai ka Nongkseh SSCC.
Ia ka shi kol ka Nongkseh SSCC la thep ia ka ha ka minit ba 56 lyngba u Shano Tariang, hynrei ka Khimusniang SC ka la ioh ia ka kabu ba kan pynphai kylla ia kane ka shi kol lyngba u Dawanbiangmi Passah (75′), ha kaba ka kol kaba u la ioh ba un thep kam lah ban khlem da ioh ia ka jingiaroh bad pyrto bha na u paid ba la poi ban sakhi ia kane ka jingiakhun.
Ka resol na ka jingiakhun ba la long ha Mairang ka Langsning FC ka la lah ba kan pynliem da 5-0 pyrshah ia ka Mishon SSCC, ha kaba u Samuel Phawa (26′, 42′), bad u Nelson Rymbai (57′, 90′) ki la lah ban lam khmat ia ka kynhun ban ioh thep mar ar kol bad sa shi kol la thep ia ka Kyrmenskhem Mukhim (32′).
Kumba ka long da kane ka jingjop, ka Langsning FC kan pyntikna ialade ba kan bat ia ka kyrdan ba nyngkong na kane ka group katba ka Mishon SSCC ka dang sah sa kawei ka jingiakhun kaban long ha ka 8 tarik mynta u bnai pyrshah ia ka Lawbah SC, kaba na kane ka jingiakhun yn sa lah ban ioh ia ka rai mano ban jam lang shakhmat bad ka Langsning FC sha ka kylla iakhun kaba ar.
Ha ka jingiakhun ha ka Group G ba la long ha Williamnagar, ka Maram FC ka la pynliem da 6-1 ia ka Attong Matgrik FC, u namtam ha kane ka jingiakhun dei u Salchang Ch Sangma (36′, 37′, 61′), uba lam khmat ia ka kynhun ban thep lai kol.
Ha ka jingiakhun ha Khliehriat kaba dei naka bynta ka Group D ka Rymbai Shkenshynriah ka la lah ba kan pynliem da 5-2 ia ka Jalaphet Moochut Pyrdung SC.
Ha ka Group B pat ka Nangkiew Irat SC ka la lah ba kan pynliem noh ia ka Mulang SC Nongbah, ha ka jingiakhun ba la long ha madan MFA Turf, Third Ground, Polio, kaba hangne u Wallamsuk Nongkhlaw (2′, 19′, 24′, 80′) marwei u la ioh ba un thep haduh 4 tylli ki kol.
Lashai ka sngi kin don artylli ki jingiakhun kawei naka bynta ka Group E ha Wahiajer ha kaba ka Lamyrsiang SCC kan iakhun pyrshah ia ka Iatyllilang Lumsehkot CSC, katba ha ka jingiakhun ka Group G ha Williamnagar ka A’chik SCO Rongjeng kan iakhun pyrshah ia ka Balmanduri FC, kiban long ha ka por 3 baje nohphai sngi.
