Shillong, Jymmang 06 : Ki seng sain pyrthei ka Jylla ha ka sngi Balang, kila ioh ia ka jngbatai halor ki jinglap ba kongsan jong ka Expert Committee on State Reservation Policy ha ka All Party Meeting bala pyniaid da u Myntri Rangbah ka Jylla Conrad K Sangma, bad ka Sorkar kala ong ba ki seng sain pyrthei kim shym la pynsngew ia kano kano ka jingiapher jingmut kaba khraw halor ka kaiphod ka Committee.
U Commissioner & Secretary Bah Cyril VD Diengdoh ula ong ba ia kane ka jingialang la pynlong hadien ka jingkular jong u Myntri Rangbah hapoh ka Iingdorbar Thaw Ain, ha ka por ba wanrah ia ka kaiphod ha ka 18 tarik Rymphang, 2026.
“Ha ki jingiakren ia kane ka mat, u Myntri Rangbah ula kren hapoh ka Iingdorbar Thaw Ain ba yn sa khot ia baroh ki seng sain pyrthei ban pan ia ki jingai jingmut jong ki bad ka jingiasyllok bad ka jingwanrah ia ki jingshem jong ka kaiphod” ula ong.
Ka kaiphod, kaba don haduh 21 valume ba jan kot 4000 sla, la dep ban sam sha baroh ki MLA, ong u Bah Diengdoh.
Ha ka jingialang ba long ha ka sngi Balang, ia ki jingshem bad ki jingai jingmut ba kongsan jong ka Committee la pynsngew shaki seng sain pyrthei bad ngi la iakren halor kine.
U iathuh ba u Myntri Rangbah ula bthah ban ai ia ki copy jong ka report sha baroh ki seng sain pyrthei.
Haba kyrngah ba batai ia ki jingpynsngew ki nongiashimbynta, u Bah Diengdoh ula ong “Kiba bun ki seng sain pyrthei kila khmih ia ka jingbatai bad kam shym don satia kano kano ka jingbym iahap jingmut kaba khraw bad kaei kaba ka Committee kala pynpaw ha ka kaiphod”.
“Kila iaroh ia ka jingshisha ba ka Sorkar kala khot ia ki kumba u Myntri Rangbah ula pynpaw ba kane kan sa urlong” ula ong haba bynrap ba ‘Lada donkam, yn sa pynlong ruh ia ka jingiakren shuh shuh ia kane ka kam bad kiwei”.
Baroh ki seng sain pyrthei kila wan ban iashimbynta ha kane ka jingialang lait noh ka Voice of the People Party (VPP).
“Ki (VPP) kila ai da ka jingthoh ba kin ym lah ban iashimbynta, kumta kan bha ba phin kylli na ki. Ngi la khot lut ia baroh ki seng sain pyrthei hynrei kaei ka dawba ki khlem wan iashimbynta, nga tharai ia kata ka jingkylli phi hap kylli na ki” ong u bah Diengdoh.
U iathuh ba ka jingbatai ba shikynta eiei kala pynleit jingmut halor ki mat ba kongsan, ka jingshong ain, ka jingieng kat kum ka riti synshar ka ri, naba bun na ki mat ki iatyngkhuh bad ka riti synshar lane ki ain”.
La kyntu ia ki seng sain pyrthei ba kin pule bniah ia ka kaiphod bad ban nang aiti shuh shuh ia ki jingai jingmut lada donkam.
“Ngam tharai ba dang donkam sa kawei ka jingialang, Katto katne ki seng sain pyrthei ki lah ban nang ai ia ki jingai jingmut hadien ba kila pule bniah ia ka kaiphod” ong u bah Diengdoh.
“Baroh na ki, kila iaroh bha ba ka Sorkar kala khot ia ki bad ngi la ai ia kane ka jingbatai sha ki” ula bynrap.
