Shillong, Jymmang 06: Ka Iingkashari Meghalaya High Court ha ka Sngi Balang, kala shimkhia halor ka jingbym pat aiti ki bor ba dei khmih ia ki jingtip halor ki sienjam kiba la shim halor ka hukum jingbthah ba shipor jong ka PIL kaba iadei bad ka Custom bad Transport bad kala ai por ia ka Sorkar Jylla bad Sorkar Pdeng ba kin aiti ia ka kaiphod.
Ka Division Bench jong ka Chief Justice Revati Mohite Dere bad u Justice HS Thangkhiew kala pynpaw ia kane haba tian bishar ia ka PIL kaba la ujor da ka Registrar General, High Court of Meghalaya, pyrshah ia ka Jylla Meghalaya bad kiwei kiwei.
Haba buddien halor ka hukum kaba la pynmih ha ka 28 tarik u Iaiong, 2026, u Dr N Mozika, DSGI, ula aiti ia ka Affidavit jong u Rajarshi Chakraborty, Assistant Commissioner, Customs Department.
U Advocate General u A Kumar ula phah artylli ki Affidavit, kawei na ka bynta ka Tnad Forests and Environment bad kawei pat kadei na ka bynta ka Tnad Transport. Baroh ki Affidavit la pynrung ha ki jingthoh bad la pynpoi sha u ‘Amicus Curiae’ Bah Philemon Nongbri.
Halor ka jingbthah kaba shipor kaba la pynmih ha ka 21 tarik u Iaiong, 2026, ka Division Bench kala pynpaw “Ngi la shem ba ym pat aiti ia kino kino ki jingtip da ki bor ba dei khmih ha kaba iadei bad kiei ki sienjam/ki kam kiba la leh da ki tnad kiba dei khmih”.
Haba kylli bniah halor kane, u Advocate General Kumar ula pan por shuh shuh ban ioh aiti ia ki jingtip ha ka rekod.
Ka iingbishar kala bthah ia ka Land Custom Station ban aiti ia ka kaiphod halor ka jingdon ki kali kiba iaid lyngba ki Check Posts hadien ba la pynmih ia katei ka jingbthah kaba shipor.
U Amicus Curiae Bah Nongbri ula pan por ban aiti ia ka kaiphod hapoh ka shi taiew ban kdew ia ki jingdkoh bad jingduna ha kaba iadei bad kitei ki Affidavit.
“Katkum ka jingong ka jongu, kila don ki jingduna ha ka rekod” la pynpaw ha ka hukum.
Ka iingbishar kala ai ia ka por bad bthah ba ia baroh ki kaiphod dei ban aiti ne phah sha ka Registry hapoh ka shi taiew bad ruh ban ai lypa ia ki kot ki sla sha baroh ki kynhun kiba donbynta.
Ka Sorkar Jylla bad Sorkar Pdeng kila ioh por ar taiew ban aiti ia ki kaiphod lyngba ki Affidavit, ryngkat bad ka jingai lypa ruh ia ki kot ki sla sha u Amicus Curiae.
Ia kane ka mukotduma la buh ban tian bishar biang ha ka 3 tarik u Jylliew 2026.
