Shillong, Jymmang 05: Ka Sorkar Jylla mynta kala ai jingithuh ia ka dohkha ‘Kha-saw’ kaba ki ong ha ka ktien nongwei ki Chocolate Mahsheer, kum ki State Fish ne ka Dohkha ka Jylla.
Ka Kynhun Myntri ka Sorkar Jylla ha ka sngi Ba-ar, kala pynbna ba ka dohkha “Khasaw”, kan dei noh ka State Fish, da kaba pynpaw ia ka jingdonkam ban tyngkai bad ban pynneh pynsah bad ban pynroi ia kane ka dohkha kaba don ha kylleng jong ka jylla.
U Myntri bad Nongaiktien ka MDA Bah Wailadmiki Shylla ula ong, ba ka jingtyrwa ban ithuh noh ia ka ‘Neolissochilus Hexagonolepis’ kum ka State Fish kadei kaba la ai jingmynjur da ka Kynhun Myntri kaba la pyniaid da u Myntri Rangbah u Conrad K Sangma.
“Ka Kynhun Myntri ka jylla kala mynjur ia ka jingpynbna ba u Chocolate Mahseer (Neolissochilus Hexagonolepis), kum ka State Fish jong ka Meghalaya” ula ong.
Ula pynpaw ba ka Meghalaya ka dei kawei napdeng ki katto katne ki jylla ka bym shim la don satia ia ka State Fish.
“Kumba phi tip, haduh mynta ka jylla Meghalaya kam don satia ia ka State Fish, hynrei lada phi peit ha kiwei pat ki jylla jong ka ri, jan kumba 22 tylli ki jylla ki lah dep ban pynbna ia ki katto katne ki dohkha kum ki State Fish ki jongki” ong u Bah Shylla.
U chocolate mahsheer udei uba la don ha kylleng ki wah jong ka jylla bad la tip ia u da ka kyrteng “Khasaw” ha ka Khasi.
“Phin iohi ia kane ka dohkha ha kylleng ki bynta jong ka jylla” ong u Bah Shylla haba bynrap ba kane ka sienjam la shim na ka liang jong ka jingpynneh pynsah.
“Ngi kwah ban pynroi bad ha kajuh ka por ngi kwah ban pynneh pynsah ruh kumjuh” ula ong.
