Nongpoh, Jymmang 05 : Ka Ophis u Superintendent of Police ka Ri-Bhoi District, ha ka sngi Ba-ar, kala pynkup burom ia ki Khynnah Skul bad ruh ia ki bor pyniaid skul jong kawei ka skul ha Ri-Bhoi, namar ka jingioh pynlait im ia I Khunlung ba shah tep im ha ka Kmie ha ki thain Mawhati.
Ki Pulit kila ong ba dei ka jingkloi jong kine ki khynnah skul lem bad ki nonghikai, kaba la pynlait im ia ine I Khunlung iba la shah bret bad shah tep ha ka khyndew ha kawei ka jaka ba marjan ka skul.
Ka video kala saphriang paidbah ha kine ki khyndiat sngi bala leit, kaba pyni ia u khynnah skul uba dang khlong ia ka khyndew kaba taplup ia I Khunlung. Ha kane ka video, la iohsngew ruh ia ka sur ki longkmie kiba bthah ban sei wut wut ia ine I khunlung na khyndew bad ban pynkhuid ia ka khyndew na ka dur khmat ba in lah ring mynsiem.
Ia ine I Khunlung la rah noh sha ki hospital ha Ri-Bhoi bad I dang don mynta hapdeng ka jingsumar.
