Shillong, Jymmang 5: Da kaba pynpaw ia ka jingduna jaka jong ka Sorkar Jylla kaba la mad jingeh ban pyntrei ia ki projek kiba thymmai, ka Sorkar Meghalaya kan thied palat 119 akar ka jaka ha East bad North Garo Hills kum ka ‘Land Bank’ na ka bynta ban tei ia ki hospital, skul, skulbah bad ia ka Mini Secretariat ha ki por kiban wan.
Ia ka jingialang jong ka Kynhun Myntri la pyniaid da u Myntri Rangbah ka Jylla u Conrad K Sangma hynne ka sngi baar, kala ai jingmynjur ia ka jingtyrwa ban thied ia ka jaka kaba 93.5 akar ha Rongalgre ha East Garo Hills ha ka dor T.7.07 Klur bad 26 akar ka jaka ha Mendipathar, North Garo Hills ha ka dor T.3.9 Klur bad ia kine la leh da kaba thied beit na ki trai jaka.
“Ka Kynhun Myntri kala ai jingmynjur ia ka jingtyrwa ban thied ia ka jaka ha Rongalgre, East Garo Hills district bad ia ka jingtyrwa ban thied ia ka jaka ha North Garo Hills ban pynlong kum ka Land Bank” ong u Myntri ka Sorkar Jylla u Bah Wailadmiki Shylla, uba long ruh u Nongaiktien jong ka Sorkar MDA haba iakren bad ki nongthoh khubor.
Ula ong, ba ka sorkar ka don ia ka jingthmu ban tei ia ki Mini Secretariat ha kylleng ki bynta jong ka jylla ban pyniajan ia ka jingai jingshakri ia ki paitbah.
“Ngi kwah ba ka jingai jingshakri kan long kaba iajan bha bad ki paitbah bad ha kawei ka jaka kan long kaba suk ia ki paitbah ba kin leit kin wan” ula ong.
Hynrei ban ioh ia ka jaka ka long ka bynta kaba mad jingeh bha.
“Ngi lah sdang sngewthuh ba wat ha kiwei pat ki district ruh, man la ka por haba ngi kwah ban sdang ia kano kano ka projek, ka mat kaba kongsan bha kadei ka jingmad jingeh ban ioh ia ka jaka. Kumba phi tip, ka long kaba eh bha ban ioh ei ia kano kano ka jaka” la ong u Bah Shylla.
U Myntri ula ong, ba ka jingtheid beit beit ka long kaba shong tad ban ia ka rukom leh ha kaban iaid ha kaban shim ia ka jaka.
Ka jaka ha Rongalgre ka lah dei ban shongdor kumba T.10.35 Klur hapoh jongka jingbuh dor jong ka Tnad Revenue hynrei ka jingioh mynta pat ka long T.7.07 Klur. Ka jaka ha Mendipathar kaba jngai 6.7 km na ka Songsak-Mendi Road, ka lah dei ban shonmgdor T.5.7 Klur lyngba ka jingshim jaka ka sorkar hynrei da kaba ioh ban thied beit beit kala shongdor tang T.3.9 Klur.
“Dei halor kane ba ka sorkar kala pyrkhat ba ka long kaba kongsan ba ngi dei ban don lypa ha kti ia ki jaka namar ha ki sngi kiban wan, ngin donkam ban tei ia ki
hospital, ngin donkam ban tei ia ki skul ne skulbah ne kiwei kiwei” ula ong.
“Kine ki artylli ki jaka kiba ngi lah thied, kan dei beit na ka bynta ki kam ban tei jingtei ha ki snem kiban sa wan”.
Ha kaba iadei bad ka jingdon ia ka Land Bank, u Bah Shylla ula ong, “Ki District bapher bapher ki lah don ia la ki jong ki Land Banks. Wat mynta ruh, ktei ka jaka kam pat long kaba dap ne biang. Kumba phi tip ha North Garo Hills, kaba long ka district kaba thymmai, kumta ki donkam ia ka jaka”.
