Shillong, Jymmang 05 : Ka jingpynlut ia ka Phase-I jong ka New Shillong Water Supply Scheme kala kiew da T.217 klur sha ka T.770 klur, namar ka jingpynkynriah ia ka dam, ka jingring bording bad ka jingthied jaka. Ia kane ka jingmang pynlut ba thymmai lah ai jingmynjur da ka Kynhun Myntri ha ka sngi Ba-ar.
U Myntri bad nongaiktien ka Sorkar MDA Bah Wailadmiki Shylla ula ong ba ka jingmang pisa ba hashuwa ka long T.553 klur.
“Ka Kynhun Myntri kala mynjur ia ka jingmang pynlut ba thymmai jong ka New Shillong Water Supply Scheme Phase-I. Kane ka jingmang ba thymmai ka long T.770 klur na ka T.553 klur” ula ong.
Ia ka jaka shna dam la hap ban pynkynriah noh shaneng jong ka wah hadien ba ka Sorkar kala ithuh ia ka Nonghali kum ka jaka kaba biang eh ban buh ia ka jaka theh niut kat kum ka juk saian.
“Kane ka dei namar ka jingpynkynriah ia ka jaka ban shna ia ka dam ha kaba ngi la hap ban rah shaneng jong ka wah da ka jingan jong ka jaka theh niut kat kum ka juk saian ha Nonghali” batai u bah Wailad.
Kila don ruh kiwei ki jingpynlut na ka bynta ban pyniaid ia ki lain bording na ka bynta ka project. Ka jingdonkam ban thied jaka ruh kala nang pynheh ia ka jingmang pisa.
“Ngi hap ban don ia ki lain bording ba dei thik ia kane ka kam-kane ruh kala nang pynheh ia ka jinglut bad ha kajuh ka por namar jong ka jingthied jaka naba ngi donkam bun ka jaka” ula ong.
Hapor ka por ba rai ban pynkynriah, u Bah Wailad ula ong ba ka jaka ban pynlong jaka theh niut ka dei kaba wan hadien bad ym pat shym la shim rai satia ha ka por ba plan ia ka Water Supply Scheme.
“Kane ka long namar hashuwa ka rai ia ka jaka theh niut, shibun ki EOI kila wan. Kumta ha katei ka por, ngim tip satia kano ka jaka ka dei kaba biang eh. Ynda kila leit sorjamin kila tip ba ka Nonghali ka dei kaba biang” ula ong.
U bynrap ba ka plan jong ka Tnad PHE na ka bynta ka Water Supply Scheme kala dep don lypa hashuwa katei ka jaka theh niut.
