Shillong, Jymmang 04 : Haba pynbna ia ka Meghalaya Non-Government School and Colleges Employees Centralized Fund Scheme, 2026 kum ka “CPF thok”, ki nonghikai bad nongtrei jong ki skul deficit bad college kila pynlong ia ka poster campaign ha baroh kawei ka Jylla haba dawa ia ka Sorkar ban pynkylla biang sha ka draft scheme bala mynjur ha u snem 2023.
Kane ka jingiakhih, bala pynlong ha baroh ki District da ka Khasi-Jaintia Deficit School Teachers’ Association (KJDSTA), Meghalaya College Teachers’ Association (MCTA) bad kiwei ki kynhun ba don bynta, kala wan jia hadien ba ka Sorkar Jylla kala aiti ia ka skhim 2026 sha Iingkashari ha u bnai Iaiong, kaba bujli ia ka skhim ba draft kham hashuwa.
“Ka skhim 2026 bala pynlait da ka Sorkar Jylla ka long pyrshah ia ka jingmyntoi bad ka bha ka miat jong ki nonghikai deficit” ong u Secretary ka KJDSTA Bah Synshar J Marwein haba iakren bad ki nongthoh khubor.
“Kat kum ka jingpynbna la kren shai ba ka dei ka NPS hynrei nga ong ia phi ba kam dei ka NPS hynrei ka dei kaba iasyriem bad ka NPS, kaba la bakla shibun. Kumta, ngin ym pdiang satia ia kane ka skhim” ula ong.
U Bah Marwein ula kdew ia lai tylli ki daw ka jingpyrshah.
“Kaba nyngkong, halor ka jingsynniang: “Lada ngi iakren halor ka NPS, ngi donkam ban synniang 10% na ka basic pay bad DA, kaba mut ba ki nongaikam bad nongtrei kin hap ban synniang10% ka basic pay bad DA. Ka shong ha ka Sorkar katno kan ai la ka long 2 lane 3, lane 4%, ngim tip satia”.
“Kaba ar, halor ka pud ban sei ia ka pisa : “Lah thoh ba phi lah ban sei ia ka pisa kaba la lang tang 50%, hynrei ha ka jingshisha, kat kum ka NPS, ngi lah ban sei haduh 60%”.
“Kaba lai, ka jingkynthup lang : ‘Lada ngi iaid kat kum ka NPF Act, 1969, ka dei ban long tang ia ki nonghikai deficit lane nongtrei hynrei ha kane ka skhim la kynthup lang ia kiwei ki nonghikai jong kiwei ki kyrdan ruh”.
Ula bynta ba ha kane ka CPF ba mynta, ka jingioh ka dang long kaba duna bha.
“Kito kiba rung hashuwa ka 1 tarik Iaiong 2010 bad kito kiba rung hadien ka 1 tarik Iaiong 2010, ngi ia ioh tang 8 %. Nga sngew ba ngi hap ban phah ia ka khubor ym tang sha ka Sorkar kaba kyllut, matlah bad bym don jingisynei, hynrei sha ki paidbah ba ngi donkam ban ioh ia ka NPS lane CPF ba shisha namar ka Sorkar ka ai ia ngi da ka CPF 2026 thok”.
U Bah Marwein u pynthikna ba kane ka campaign kan dang iai bteng ha baroh kawei ka Jylla hynrei u ong ba ia kiwei ki sienjam jong ka jingiakhih yn sa shim rai da ka KJDSTA central body.
“Ngi kum ki nonghikai deficit, ngi pyrshah ia ka skhim kaba ka Sorkar ha u bnai Iaiong mynta u snem, kala mynjur bad aiti sha Iingkashari, kaba bujli noh ia ka hukum kaba ngi baroh ngi la mynjur ha u snem 2023” ula ong.
Ka Dkhot ka KJDSYA Kong I Marbaniang kala pynkynmaw ia ka jingiakajia sha u snem 2017, haba ki nonghikai deficit kila leit tied jingkhang jong ka Iingkashari Meghalaya High Court ban ioh ia ka pension scheme na ka bynta kiba shongthait. Ka Iingkashari kala bthah ia ka Sorkar ban pynbeit ia kane ka kam.
Ha u Nalur 2023, ka Sorkar kala draft ia ka CPF na ka bynta kito kiba rungkam hashuwa ka 1 tarik Iaiong 2010 bad ka NPS ia kito kiba rungkam hadien.
“Ia ki jingai jingmut la iapdiang ha u bnai Risaw 2023” ong ka kong Marbaniang.
Hadien ka jingbthah jong ka Iingkashari halor ka CPF kaba rim, ki nonghikai kila sei ia ka pisa jong ki ha u snem 2024 bad thep pat ha ka consolidated SBI account ha Laitumkhrah.
“Hynrei, naduh u Nailur 2024, ngi la sei lut ia baroh ka CPF jong ngi bad thep ia ka pisa ha ka SBI Laitumkhrah Branch kumba la bthah da ka Sorkar hynrei sngewsih ba haduh mynta, ka Sorkar kam shym la leh eiei halor kane ka kam” kala ong.
Kane ka jingpynslem kala ktah jur bha ia kiba la shongthait, kala bynrap.
Ka campaign ka long ka jingpynpaw ba jai jai ia ka jingsngewkhia jong ki nonghikai bad ki nongtrei, kynthu kito kiba la shongthait, kiba la ong ba ka skhim 2026 ka ktah ia ka kamai kajih jong ki hajar ngut ki nongtrei jong ki jaka pule deficit.
Kine ki kynhun kila kyntu ia ka Sorkar ba kan burom ia ka hok jong ki nongtrei da kaba pyntreikam ia ki kyndon ain kiba don mynta, bad ban kiar na kaba pynjari ia kano kano ka policy kaba ktah ia ka bha ka miat jong ki nongtrei/nonghikai kiba dang shakri bad kiba la shongthait.
Ki poster kiba la tah ha kylleng ki jaka ki ong kumne : “Khlem ki nonghikai deficit, ka Meghalaya kan long ka Jylla ba duna ha ka pule dangle”, “Ka jingshongthait ryngkat ka jingiben da ka Sorkar”, “Ka jingdawa jong ngi : Ka draft scheme 2023 ba la iamynjur lang”, “Sorkar baieid burom iala ka jong ka jingpynbna, ai ka skhim 2023 bad NPS ym ka skhim 2026”.
