Nongstoiñ, Jymmang 04: Ka Little Star English Secondary School sa shisien ka la rah biang ia ka nam lahduh ha ka lympung ialehkai sports ki khynnah skul, kaba dei ruh ka lympung kaba san kaba la tip kum ka 5th EWKH District Level Inter School Athletics Meet jong u snem 2026.
Kane ka lympung ka dei kaba la pynlong da ka ophis treikam jong ka District Sports Officer (DSO) West khasi Hills District ha ryngkat ka jingiatreilang bad ka District Sports Association Mairang.
Ia kane ka lympung kaba lai Sngi lynter, la pynlong ha madan Khadsawphra College Mairang ia kaba la pynhap pyrda noh ha ka 1 tarik Jymmang, ha kaba la ioh ban sakhi ia ka jingiashimbynta shitrhem jong ki khynnah skul kynthei bad shynrang kiba kot haduh 800 ngut na ki 26 tylli ki skul napoh kane ka District Eastern West.
La pynhap noh ia ka lama jong kane ka Lympung da u President ka MSOA, bah John F Kharshiing kum u Kongsan, ha ryngkat ka jingiadonlang ka DSO WKH ka kong Balarina Syiem, u Sordar ka shnong Pyndengumiong u bah Bornad Syiemiong, ki Principal na ki skul bapher bapher ki nonghikai, ha ryngkat ki khynnah skul.
U bah Kharshiing haba kren ha kane ka sngi u la ong ba ym dei pyndonburom tang ia kiba jop, hynrei ban iakmenlang wat ia kito ki bym shym la jop ruh kiba don kata ka mynsiem ban ïashimbynta, da kaba pynpaw ba ka jingiashimbynta ki khynnah skul U-14, U-16 bad U-18 ki long kiba donkam bha, kiba na ka liang ka tnad Sport, ki pyrshang ban jied bad ban wad ia kiba don ka sap ba kyrpang.
U la ong ba kane ka jingiashimbynta ha ka district level ka dei ka jingsdang ka jong ki da kaba kyntu ruh ba kin dang iai trei shitom bad minot ha ka kilan met, khnang ba ka Jylla kan lah ban sei ia ki ha ka National, International bad ha ki olympics na ka Jylla la jong.
La ioh ruh ban sam ia ki khusnam sha ki rang bad ki thei ialehkai kiba kynsai da ki syrnod ha ryngkat ki trophy, ha kaba ka lahduh ka Little Star ka la khur bun ki trophy. Katba ia ka nam best Discipline team la ioh da ka Langtor Hr Sec School bad ia ka nam best March pass la rah da ka Pyndengumiong Presbyterian HSS.
