MSL | Pynliem ka Umdang Pyllun ia ka Rangdajied United | Nang sar nam jop ka Lajong, Shkenshynriah bad Lasning

Shillong, Jymmang 01 : Ka Seng Samla Umdang Pyllun ka la sei ia ka khubor lam pongpet ha ka lympung 5th Meghalaya State League, hadien ka jinglah ban pynliem ia ka Rangdajied United FC da 2-1 da kaba kthong nadien, ha ka jingiakhun ka Group H ba la long ha Mawkyrwat hynne ka sngi.

Haba phai sha ka jingiakhun, ha ka minit ba 15, u Elnathan D Wahlang  ka RUFC u la ioh ia ka kabu ban pynkhih ia ka jar, ia kaba ka kynhun ialehkai ka Seng Samla Umdang Pyllun ka la ieng iakhun tyngeh tad haduh ba kan da pynphai kylla ia kine ki ar kol lyngba u Rangkynsaistar Mawsor (59′) bad Wanbhalang Mawsor (63′), kaba biang pura ia ka kynhun ban khur syndon ia kane ka nam jop.

Ka resol na ka jingiakhun ka Group E, ba la long ha Wahiajer, ka Shillong Lajong FC ka la lah ba kan pynliem da 7-0 ia ka Lumsehkot CSC kaba la biang puyra ia ka ban khreh ban jam shakhmat ha kane ka lympung ialehkai

Haba phai pat sha ka jingiakhun ba la long ha Mairang, ka Langsning FC ka la lah ba kan pynliem da 9-0 ia ka Lawbah SC ha ka jingiakhun ka Group F, kaba hangne u Samuel Phawa (10′, 36′), Damonlang Pathaw (12′, 50′), Donlad Diengdoh (27′, 32′), ki la lah ban lam khmat ia la ka kynhun ban thep mar ar kol bad ia ki kol ba sah la thep ia ki da u Dajiedlang Wanshnong (32′), Ronneychel Khongrangjem (38′) bad u Nelson Rymbai (79′).

Ka resol na ka jingiakhun jong ka Group G, ki lai kol u  Keri G Momin (11′, 38′, 73′) ka la biang pura ia ka kynhun ialehkai ka A’chik SCO Rongjeng ba kan pynliem noh ia ka Attong Matgrik FC da 5-0 ha ka jingiakhun ba la long ha Williamnagar.

Katba ka jingiakhun ha Khliehriat ka Rymbai Shkenshynriah SC ka la lah ba kan pynliem noh da 3-0 ia ka Thangskai Tiger

Ha ka jingiakhun ka Group B ba la long ha madan ka MFA Turf Third Ground Polo, ka kynhun ialehkai ka Mawlum Tyrsad SCC, ka buh ialade ha ka thong ban jam shakhmat hadien ba ka la lah ba kan pynliem noh da 6-0 ia ka Mulang SC Nongbah, kaba hangne u Ebetstar Nongbet (48′, 71′, 75′), marwei u la lam khmat ia ka kynhun ban thep lai tylli ki kol.

Kyntang ia wai ka kynhun ialehkai ka  Laskeiñ SCSC ka la lah ba kan pynliem noh ia ka Amlarem SC da 2-1 ha ka jingiakhun ka Group C  ba la long ha Amlarem.