Shillong, Iaiong 28 : Ka Iingkashari Meghalaya High Court ha ka sngi Ba-ar, kala ther ia ka Sorkar Jylla halor ka jingbym biang ki jingai jingkhein halor ka kam khaii ia ki minor mineral, haba pynpaw ba kane ka pyni ba ka don ka jingpyrshang ban ialam bakla ia ka Iingkashari ha ka mukotduma public interest litigation (PIL).
Ka Division Bench jong ka Chief Justice Revati Mohite Dere bad Justice HS Thangkhiew, kala thung ruh ia u Advocate Philemon Nongbri kum u amicus curiae bad hukum ia u Commissioner of Transport bad Secretary ka Tnad Forest ba kin wan mih hi dalade ha Iingkashari ha ka sien shong bishar ban wan.
Haba bishar ia ka PIL bala mudui da u Registrar General ka High Court, ka Iingkashari kala bishar ia ka status report bala aiti da u Advocate General A Kumar na ka bynta ka Sorkar.
Ka kaiphid bala soi da u Commissioner of Transport, ka kam ha ka paragraph 10 “ Ka long kaba don kam ban kdew ba hapdeng u bnai Iaiong 2025 haduh Rymphang 2026, haduh 2,030 tylli ki kali kila kit ia 25,903 MT ki minor mineral, kaba pyni ba ym duna ia ka 7 tylli ki kali ki iaid ha ka shisngi ban khaii ia ki marpoh khyndew ha Jaintia Hills Territorial Division”.
Ka Iingkashari ka shem ba kane ka jingkhein bala ai, kam iahap satia bad ki jingkhein bala pynpaw ha ki annexure ne kiwei pat ki kot bala pyndait lang.
“Ka jingpyntip jong u Commissioner of Transport ha ka status report ka long pyrshah ia ka chart bala pyndait lang da u Commissioner ha ka sla 29” ong ka hukum.
Hadien ba ka Iingkashari kala pynsngew ia kane ka mat, u Advocate General ula pan por ban ioh ia ka jingbthah.
Ka Iingkashari ka sngew “ba don eiei ha lyndet, kaba paw ba ka don ka jingpyrshang ban ialam bakla ia ka Iingkashari haba iadei bad kane ka jingai jingkhein bala kdew haneng…ka chart bala pyndait lang kum ka annexure 6 ha ka slab a 29”.
Ka Iingkashari kala kdew ba ka kaiphod ka pyni ba ki kali kila shah dain kuna namar ka jingpynkhein ia ka kyndon 192. 190 (2) bad 179 jong ka Motor Vehicle Act, 1988, hynrei ym shym la pynngat mukotduma satia.
“Ka paw ruh ba ym shym la ujor mukotduma pyrshah ia kine ki kali, kiba la shem ba ki pynkhein ain, hapdeng ka 22 tarik Iaiong 2026 bad 25 tarik Iaiong 2026” ong ka Iingkashari.
Ha kajuh ka por, u DSGU Dr N Mozika ula aiti iala ka jong ka status report na ka bynta ki BSF kala pynpaw “La pynsngew hangne ba ka kamram jong ki BSF ka long ban ai pahara. Kam don bynta eiei ruh ha ka jingpeit ia ki kot ki sla ha ka kam khaii, bad kumjuh ruh ban ai lane talasi ia ki driving licecne, PUC certificate, fitness certificate jong ki kali kynthup ka jingkit mar, naba ki BSF kim shym la ioh bor ban talasi ia kikot ki sla da kano kano ka ain”.
Ka kaiphod kala dew ia ka hukum ka Iingkashari jong u snem 1999 bad ka shithi na u Commissioner of Custom, Shillong ha u snem 20023 halor ka kamram ki BSF hapoh ki Land Custom Station.
“Haba shimkhia halor kine ki mat bala iakren, ngi sngew dei ban thung ia u Bah Philemon Nongbri kum u Amicus ban iarap ia ka Iingkashari” hukum ka Iingkashari.
.){kind=link}