Meghalaya State League | Khur nam jop ka Langsning, Nongkseh bad Lumphyrnai | Iakhaid ka Mawlai bad Laskein

Shillong, Iaiong 28: Ka lahduh jong ka samoi ialehkai kaba la dep, ka Mawlai Sports Club ka la mad ia kawei na ki jingiakhun kaba jwat bha pyrshah ia ka Laskein SC kaba kut ha ka jingiakhaid da mar 2 kol, ha ka jingiakhun ka Group E ka lympung 5th Meghalaya State League, ba long ha Amlarem, ha ka sngi Ba-ar.

Kumban shu pynkynmaw hangne ba jan mar shiteng na ki rang ialehkai ka Mawlai SC, ki don mynta sha ka lympung ialehkai ka the I-League 3, kaba la long ha Manipur, kaba na kane ka daw khyndiat ka la ktah bha ia ka kynhun ha kane ka jingiakhun ka MSL.

Katba ka kynhun ialehkai jong ka Langsning FC lem bad ka Nongkseh SSCC, kim shim la don satia kano kano ka jingeh hadien ba ki la lah ba kin pynliem da 8-0 ia ka Umlakro bad ia ka Mawshun SC.

Haba phai sha ka  Langsning FC ka jingjop ka jong ka, ka la wan hadien ba u Nelson Rymbai (32′, 62′, 88′, 90’+1) u la lam khmat ia ka kynhun ban thep haduh lai kol.

Katba na ka liang ka kynhun ialehkai jong ka Nongkseh SSCC u Chesterpaul Lyngdoh (16′, 35′, 88’P), u la lah ban lam khmat ia la ka kynhun ban lah ban pynliem ia ka Mawshun SC da 8-0, haka jingiakhun kaba dei naka bynta ka Group A.

Ka khubor na ka jingiakhun ha Wahiajer kaba pynlong ia ka jingialehkai jong ka Group E pat ka long ba ka Lumphyrnai Sohphoh FC ka la lah ba kan pynliem ia ka Lamyrsiang SCC 6-1, kaba hangne u Rio (9′, 45’+3, 72′, 79′), u la lam khmat ia la ka kynhun ban thep haduh lai kol

Ha ka jingiakhun ka Group B ba la long ha madan ka MFA Turf, ka kynhun ialehkai ka Mawphu ki la ieng iakhun tyngeh ban pynliem ia ka Mulang da 3-0.

Katba ha ka jingiakhun ka Group D ha Khliehriat ka Rymbai Shkenshynriah SC ka la lah ba kan pynliem noh ia ka Ladthadlaboh SC da 2-1.

Katba ka jingiakhun ha Williamnagar ka kynhun ialehkai ka Maram FC ka la pynliem noh ia ka A’chik SCO Rongjeng da 3-2 ha ka jingiakhun kaba dei jong ka Group G.

Kyntang iawai ha ka jingiakhun jong ka Group H ka jingiakhun hapdeng ka with Seng Samla Umdang Pyllun pyrshah ia ka Mawten SC ka la kut noh ha ka jingiakhaid kaba long da mar shi kol.

Lashai pat ka sngi kan don tang kawei ka jingiakhun kaba dei ka Group G ha kaba ka Attong Matgrik FC kan iakhun pyrshah ia ka Janepih YSCA kaban long ha ka por 3 baje nohphai sngi ha Williamnagar.