Shillong, Iaiong 28 : Ka Sorkar Jylla kala kut jingmut ban pyndep ia ka surok Shillong-Dawki project hapoh u snem 2027 bala buh bad kala bthah ban peitngor baroh arphew sawkynta bad ban iaid survey ha ki jaka kiba idon jingma khnang ban iada ia ka jingduh ki mynsiem briew na ki jingtwa kyndew bad hap maw.
Haba kren sha ki lad pathai khubor ha ka sngi ba-ar, u Symbud Myntri Rangbah ba khmih ia ka Tnad PWD (Roads) Bah Prestone Tynsong ula ong “Na ka liang ka Sorkar, ai ba ngan kular biang ia ki paidbah ba ngi kwah ban pyndep ia kane ka project kham kloi kat kabbalah bad ngi kwah ruh ban kyrpad ia baroh ki nongshongshnong ka thain, kiba shah ktah ba kin sngewbha ban iai shah lem namar ngi kwah eh ban pynthikna ban gin pyndep ia ka project kham kloi kat kaba lah”.
“Ia mynta, ka thong bala buh ban pyndep ia kane ka project ka dei haduh u snem 2027 bad nga thikna ba ngin lah ban pyndep ia ki jingshna pynheh ia ka surok sha ka 2-lane” ula bynrap.
U Bah Prestone ula ong ba ka jinglong riat jong ka jaka kala buh ha ka jingeh ban shna ia ka surok namar ka jingtwa khyndew man ka por khamtam ha ka por slap.
“Phi la iohi hi ba ka jinglong jong kane ka surok na Shillong sha Dawki ka dei kaba rit bad wat ka jaka ruh ka khim bha. Lada phi kren ia ka liang ka mon, phin iohi ia ka jaka ban pynheh surok ka long kaba rit bha bad lada phi kren ia ka bynta sha ka diang, ka dei ka riat ka ram suda” ula ong.
U ong ba ka Sorkar kala bthah ia ka NHIDCL, ka Tnad PWD bad ki bor Distrct ba kin shim ia ki lad jingiada na ka bynta ka jingshngain.
Ha kajuh ka por u Symbud Myntri Rangbah ula kyntu ia ki nongshongshnong ka thain ba kin kiar ia ka leit ka wan ki bym da donkam eh, na kane ka surok ha ka por slap.
“Nga kwah ban kyrpad ia baroh ki nongshongshnong ka Pynursla haduh Dawki ba kin sngewbha ban kiar ia ka leit ka wan ki bym da donkam eh, na Dawki sha Shillong lane na Shillong sha Dawki lyngba kane ka surok ha ka por slap lait noh tang ki khep ki bym lah kiar” ula ong.
