Shillong Iaiong 28: Ki Sorkar Jylla jong ka Meghalaya bad Assam ki dang iatreilang ban pynbeit ia kino kino ki jingthud jong ka jingkit ia ki mar ki mata sha ka thaiñ Garo Hills.
Haba pyntip ia kane hynne ka sngi Baar, u Symbud Myntri Rangbah ka Jylla u Bah Prestone Tynsong ula ong, “Mynta ngi lah shimkhia ia kane bad ka sorkar Assam bad baroh ar ki sorkar jong ka Assam bad Meghalaya kila iatreilang bad ngin sa pynbeit ia kane ka mat namar ba kala mih ka jingbym iasngewthuh jingmut kaba lah dei na katei kawei ka liang ne na ka liang ka jong ngi, hynrei ngin sa ia pynbeit noh bad ngin pynthikna ba kam dei ban don kano kano ka kam kaban khang ia ka jingkit ia ki mar ki mata ha shi lynter jong ka thaiñ ha rilum Garo”.
Ula ong, ba baroh artylli ki jylla kila iatreilang ban tehlakam ba kam dei ban don kano kano ka jingshah pynsangeh bad ban pynthikna ba ka jingkit ia ki mar kam dei ban shah pynthud.
Kane ka jingai jingkular kala mih hadien ba kala mih ka jingsngewkhia ha kaba iadei bad ka jingkit ia ki mar ha shi lynter jong ka rilum Garo.
