Shillong, Iaiong 28 : Ka Sorkar Jylla kala pynsangeh noh ia ka jingthmu ban shna ia ka surok Fly-Over na Rilbong sha Barik Point bad ha ka jaka jong kane, kan shna noh da ka surok 4-lane, kaba dei ka jingai jingmut jong ki bor shipai kiba kdew ia ka jingshngain bad ka jingiada.
Haba pyntip ia kane ha ka sngi Ba-ar, u Bah Prestone ula ong “Na ka liang ka Sorkar, ngi ruh ngi kwah ia ka surok fly-over na Rilbing sha Barik Point hynrei, hadien ka jingiakren bad ki bor shipai, ki bor shipai kila ai jingmut ia ngi ban shna noh da ka surok 4-lane namar ka jingshngain. Kumta, kan bha ba shna da ka surok 4-lane ha ka jaka ka fly-over”.
U iathuh ba ia kane ka rai la shim hadien ka jingiasyllok bad ki agency bapher bapher.
“Ta ka daw ngi la shim ia ka rai da kaba ong ba to ngin ia pynlong ia ka jingiajurip lang na ka Tnad PWD, ki bor Disrict bad ruh na ka NHIDCL lembad ki bor shipai” ula ong.
Halor ka jingiaid ki kam ba iadei bad ka project 4 lane, u Bah Prestone ula ong ba ka jingiaid sorjamin kala sdang.
“Ka sorjamin kala sdang bad ka jingialeit sorjamin lang bad ki heh shipai ka 101 Area ka dang iaid” ula ong haba pyntip ba kane ka surok 4-lane kan iaid naduh ka lad Rilbong haduh ha Barik Point.
Kat kum ka jingong jong u, ia ka Detailed Project Report yn sa pynkhreh hadien ba dep ka jingia sorjamin lang bad ki shipai ka 101 Area, PWD, ki bor District bad ka NHIDCL.
