Shillong, Apr 27: Ki kynhun ialehkai football kiba heh kum ka Shillong Lajong FC, Nangkiew Irat SC bad ka Khimusniang SC kila iai bteng ban khur ia ka jingjop ha ka lympung 5th Meghalaya State League hynne ka sngi Nyngkong, hynrei kila don ruh kiwei pat ki kynhun ialehkai ha kiwei ki Group kiba la pyni ia kaei kaei kaban kham itynnad.
Wat hapdeng ka jingjur slap ha kylleng jong ka jylla, kaba la pynlong ia ka rukom ialehkai ba kan long kaba jwat ia ki nongialehkai football, hynrei ha ka Group F hapdeng ka Lawbah SC bad ka Mishon SSCC ha Mairang ym shim la lah satia ban pyniaid shakhmat namar ka jingbym long ka madan bad la hap ban pynkynriah noh ia kane ka jingiakhun.
Ha Mawkyrwat, ha ka Group H ka jingiakhun kala long hapdeng ka Mawlarshong SC pyrshah ia ka kynhun radbah na Shillong ka Rangdajied United FC hynrei ka jingiakhun kala kut da ka jingiakhaid kaba 0-0. Ka Mawlarshong kala iakhun teng ha ka sien kaba nyngkong ia ka Rangdajied ha ka MSL 2023 bad ha kane ka jingiakhun ruh kala kut ha ka jingiakhaid da 1-1.
Ka jingiakhun ha Williamnagar kala kut hapdeng ka jingiakhaid khlem kano kano ka jingthep kol hapdeng ka Janepih YSCA pyrshah ia ka Balmanduri FC. Ka Janepih kadei ka kynhun kaba la jop ha baroh 3 tylli ki jingiakhun ha ka Group H hynrei hynne ka sngi kala shu iakhaid noh.
Ha Khliehriat, ka Thangskai Tiger SC kaba la i kumba kan mad ia ka jingrem ha ka Jalaphet Moochut Pyrdung SC ha ka jingiakhun ha ka Group D hynrei ka Thangskai Tiger SC kaba la shah thep nyngkong 1 kol hynrei kala ioh pynban ban thep 2 kol ban khur ia ka jingjop.
Hadien ba ka kylla step kala kut ha ka jingiakhiad khlem ka jingthep kol, u Thomas Dkhar ha ka minit kaba 53 ula thep ia ka kol na ka bynta ka Jalaphet Pyrdung hynrei ka Thangskai Tiger kala iakhun tyngeh bad kala ioh thep 2 kol lyngba u Wendi Markson Nongtdu ha ka 72 minit bad u Solmon Sympli ha ka 87 minit.
Ha ka Group C, ka Amlarem SC kala jop da 3-1 ia ka Lamin XI SCC. U Iaid Da Kyrmen Jungai ula thep ia ka kol ha minit kaba 4 bad u Marshial Nongrum ula thep ia ka kol ha ka 27 bad 83 minit na ka bynta ka Amlarem katba u Densil Kongwang ul thep kol ha ka 78 minit na ka bynta ka Lamin XI.
Ka Shillong Lajong kaba la long ka lahduh ha u 2019 kala pynrem da 5-0 ia ka Iatyllilang Lumsehkot CSC ha ka Group E kaba la long ha Wahiajer. La thep tang shi kol ha ka kylla step lyngba u Lalmuansanga ha ka 25 minit hynrei ka Lajong kala thep sa 4 kol ha ka kylla miet lyngba u Colinsalmon Lyngdoh ha ka 56 minit, u Iohborlang L Lyngkhoi ha ka minit kaba 70, u Ricky Kharkongor ha ka 89 minit bad u Kapten u Wilbert D Marbaniang ula thep ia ka kol ha ka minit kaba 90’+4.
Ha ka jingiakhun ha ka Group B ha MFA Ground, Shillong ka Nangkiew Irat kala jop da 5-0 pyrshah ia ka Mawlum Tyrsad SCC. Ka Nangkiew Irat kala ioh thep shi kol ha ka kylla step lyngba u Neblejohn Lyngkhoi ha ka minit kaba 7.
Ha ka kylla miet kala bteng ban thep sa 4 kol lyngba u Banshanlang Nongdhar ha ka minit kaba 63 bad u Wallamsuk Nongkhlaw ula ioh ia ka hat-trick da kaba thep ia ki kol ha ka minit kaba 75, 85 bad 90.
Ha ka Group A kaba la long ha SSA Stadium in Shillong, ka Khimusniang kala pynrem ia ka Umkaber SCC da 9-0. U Primrose Lamat ula thep kol ha ka minit kaba 3 bad 45’+2 bad mynta ula kynjoh sha ka jingthep haduh 9 kol ha ka MSL, katba u Meroily Lytan ula thep kol ha ka 12 bad 89 minit, u Dashngain Sukhlain ula thep kol ha ka 30 minit, u Dawanbiangmi Passah ula thep kol ha ka minit kaba 36 bad u Civility Khongmalai ula thep kol ha ka 69 minit bad kala don ruh ka jingbakla ha ka minit kaba 16 na u nongialehkai ka Khimusniang ha kaba ka bol kala leit rung shapoh kol.
Ki jingiakhun lashai ka sngi kin sdang ha ka por 3 baje mynsngi:
Group A (Shillong SSA Stadium) – Mawshun SCC vs Nongkseh SSCC
Group B (Shillong MFA Ground) – Mulang SC Nongbah vs Mawphu SC
Group C (Amlarem) – Mawlai SC vs Laskein SCSC
Group D (Khliehriat) – Rymbai Shkenshynriah SC vs Ladthadlaboh SC
Group E (Wahiajer) – Lamyrsiang SCC vs Lumphyrnai Sohphoh FC
Group F (Mairang) – Umlakro SC vs Langsning FC
Group G (Williamnagar) – Maram FC vs A’chik SCO Rongjeng
Group H (Mawkyrwat) – Seng Samla Umdang Pyllun vs Mawten SC
