Shillong, Iaiong 27: U MDC ka Voice of the People Party (VPP) Bah Shemborlang Rynjah u la dawa ban don daka jingkhmih bniah ne audit daka kynhun laitluid ïa ka jingshngaiñ jong ka surok Shillong–Pynursla–Dawki, haba kdew ba ym duna ïa ka 10 ngut ki briew ki la duh noh iala ka mynsiem ha katei ka surok naduh u snem 2023 namar ka jingtwa khyndew, ka jinghap maw bad ka jingtorti ka rukom pyntrei.
Ha ka shithi sha u Myntri Sorkar Pdeng ba khmih iaka tnat Road Transport and Highways Nitin Gadkari, u Bah Shemborlang u la ong ba ki kam pynheh ïa ka surok kiba dang ïaid shakhmat ki la wanrah ïa ka jingkiew ki jingjia aksident kaba ka wanrah ia ka jingiap briew bad kane ka pyni ïa ka jingbymlah ban pynthikna ïa ka jingshngaiñ jong ka surok ha ka por pyntrei.
“Dei ban hukum ban don daka jingpeit bniah daka kynhun laitluid ïa ka jingshngaiñ haba pyntrei iaka surok ha baroh kawei ka bynta jong ka Shillong–Pynursla–Dawki,” u la kyntu ha ka shithi haba pynpaw ba kane kan dei ka sienjam ba nyngkong naka Ministry ban wanrah jingshngain haba pyntrei iaka surok.
U Bah Shemborlang uba mihkhmat ia ka Lyngkyrdem–Laitkroh constituency hapoh ka Khasi Hills Autonomous District Council u la ong ba kane ka jingpeit bniah ka long kaba donkam ban bishar ia ki jingma ha kylleng ka surok kaba pyniasoh ia ka nongbah Shillong sha Dawki bad ki jaka jngohkai pyrthei kum ka Shnongpdeng bad Mawlynnong.
U la kdew ruh iaki jingma kiba ju jia mih naka por shaka por ha shilynter jong ka surok Shillong-Dawki.
“Ki khubor ba dang shen ki pynpaw ïa ki jingeh kiba mih namar ka jingpyntrei iaka surok Shillong-Dawki, kynthup ïa ka jingïap jong arngut ki briew hadien ka jingtwa khyndew bad khyllen ki maw kiba la ban iaka kali” ula ong.
“Kaba kham kongsan ka long ba naduh u snem 2023 haduh mynta, ym duna 10 ngut ki mynsiem briew ki la duh ha ki jingjia aksident ha kane ka bynta namar ka jingtwa khyndew bad hap ki maw” ula bynrap.
“Kine ki jingjia kiba ju jia man ka por ki kdew sha ka jingbymlah ban pynthikna ïa ka jingshngaiñ haba pyntrei iaka surok, ha kaba pynkheiñ ïa ki kyndon Motor Vehicles Act, 1988 (as amended), Indian Road Congress (IRC) bad ki jingbthah ba la buh halor ka jingshngaiñ ha ki jaka trei,”la ong ka shithi.
U la pynpaw ia ka jingbym don ki jingthoh jingmaham, ki Reflector bad ki jingiada naka jingtynrah ha ki jaka ba don jingma, ka jingpyntrei torti, ka jingtih maw khlem da bud iaki kyndon kaba buh jingma iaka leit ka wan.
 Bah Shemborlang Rynjah u la dawa ban don daka jingkhmih bniah ne audit daka kynhun laitluid ïa ka jingshngaiñ jong ka surok Shillong–Pynursla–Dawki, haba kdew ba ym duna ïa ka 10 ngut ki briew ki la duh noh iala ka mynsiem ha katei ka surok naduh u snem 2023 namar ka jingtwa khyndew, ka jinghap maw bad ka jingtorti ka rukom pyntrei.){kind=link}