Shillong, Iaiong 27 : Ka North East Students’ Oraganisation (NESO) kala dawa ia ka jingtuklar ba mardor, ba leh hok bad haba shit haba shai ban tehlakam noh ia ka jingnangheh ki kam iaumsnam ha Manipur, haba pynpaw ia ka jingsngewkhia kaba jur ia ka jingiai jia ki kam iaumsnam hapoh ka Jylla.
Ha ka kyrwoh ba pynmih ha ka sngi Nyngkong, ka NESO kala pynpaw ba ka sngewkhia kaba jur halor ka jingiai jia ki jingkulmar bad jingiaumsnam kiba bteng ban jia ha Manipur.
“Ka Seng ka sngewsih jur ia ka jingbteng kine ki jingjia kiba sngewsih, ha kaba ka jingim jong ki lui lui la shu duh noh bad ka jingnang iap ka mynsiem ban ia im suk im sain ryngkat lang” ong ka kyrwoh.
Haba shim ia ka jingthombor ia ki nongshongshnong kum ka jingsngewkhia kaba jur ha ka jingsngew para briew, ka NESO ka ong “Kine ki kam umsnam ba iai jia pyrshah ia ki nongshongshnong ba khlem tiar, ka pyni ia ka jingsngewkhia kaba jur bha, kaba ktah ïa ka tynrai jong ka burom briew, ka jingshngaiñ bad ka hok ba kongsan ban im ha ka jingsuk.”
“Ki jingiausnam ba dang iai bteng, kala pynsyllang shikatdei eh ia ki longiing longsem ki bym lah niew shuh bad kumjuh ruh ia ka imlang sahlang, kaba ieh shadien ia ka dak ka jingsngewsih, ka jingtieng bad ka jingbym thikna” kala bynrap.
Ka Seng ka phah ia ka jingsngewlem sha baroh ki Longiing kiba la duh noh iala ki baieid bathoin ha kane ka jingiakynad kaba la neh la slem bha bad ka ieng iatylli lang bad man ki lanot kiba shah ktah ha kane ka jinglong jingman ka bym itynnad.
Haba buh jingkylli ia ki kam bala leh da ki bor Sorkar, ka NESO kala ong “Ha kane ka por, ka seng ka shem ba ka long kaba donkam ban buh jingkylli ia ka jingbym lah jong ki bor ka Sorkar Jylla bad Sorkar Pdeng ban tuklar bha jai bad ban pynkut noh ia kane jingeh kaba la slem bha, kaba la iaid da ki snem”.
“Ka jingbym lah ban wanrah pat ia ka jingsuk bad jinglong jingman kumba ju long, ka pyni ia ka jing bym don ka jingsngewkhia ha ka synshar khadar bad ka jingkitkhlieh” kala ong.
“Ka NESO ka dawa ia ka jingtuklar ba mardor, ba leh hok bad ba leh haba shait ban pynkut noh ia ka jingnang heh kane ka jingiaumsnam. Ka long kaba donkam ba dei ban pynioh ia ka jingbishar kaba hok khlem ka jingpynslem” ong ka kyrwoh.
“Kito kiba donkti ban leh ia kum kine ki kam ba shyrkhei ki dei ban shah tynrong ia ka jingbahkhlieh” kala bynrap.
 kala dawa ia ka jingtuklar ba mardor, ba leh hok bad haba shit haba shai ban tehlakam noh ia ka jingnangheh ki kam iaumsnam ha Manipur, haba pynpaw ia ka jingsngewkhia kaba jur ia ka jingiai jia ki kam iaumsnam hapoh ka Jylla.){kind=link}