Shillong, Iaiong 27 : Ka Pynursla Civil Sub-Division kala khang ia ki trok bad ki kali kiba kit mar palat 9 metric ton ba kin iaid na ka Jingkieng Dawki, haba pynpaw ia ka jingbym shngain bad ka jinglah ban dkut kane ka jingtei.
Ia kane ka hukum la pynmih da u Sub-Divisional Magistrate Gautam Warjri hapoh ka kyndon 163 jong ka Bhartiya Nagarik Suraksha Sanhita (BNSS), bad kan treikam noh mardor ha baroh u pud u sam jong ka Pynursla Civil Sub-Division.
Haba kdew ia ka kaiphod na u Assistant Executive Engineer, PWD( Roads), Pynursla Sub-Division, ba 11 tarik Rymphang, 2026, ka hukum ka ong “ Ka jingbuh pud ia ki trok kit maw /kit mar bad ki kali kamai ba iaid lyngba ka Jingkieng Dawki la donkam ban pyrrkhing ia ka jingkhia ba bun duh kaba long 9 metric ton”.
Ka hukum ka pynpaw ba ki trok “kila kit maw / kit mar ba palat ia u pud bala buh (9 metric ton) khlem da niewkor ia ka jingpyrrkhing bala pynmih ha ka 12 tarik Jylliew 2024 bad 24 tarik Jylliew 2019”.
“Ka jingpynkhein ba kum kane, lada ym tehlakam bad buh kyndon, ka lah ban lam sha ki jingjia kiba lah ban wanrah ia ka jingdkut kane ka jingkieng, ka ban ktah pat ia ka jingdkut ka jingpyniasoh bad nang buh shuh shuh ia ka jingma ia ki jingim briew bad ka jingdon jingem” maham ka hukum.
Ula ong ba kano kano ka jingpynkhein ia ka hukum yn leh da kaba tyngeh kat kum ki kyndon ka Motor Vehicle (MV) Act, 1988 bad kiwei kiwei ki kyndon ain.
