Shillong, Jylliew 17: Ka Meghalaya State Commission for Women (MSCW) hynne ka sngi thohdieng, kala ai jingmut ban leh da kaba tyngeh pyrshah ia ki Pulit halor ka jingbym leh eiei ia ka jingujor bala mudui pyrshah ia u J Jana, uba pyniap ia ki arngut ki Khun lajong ha khlaw Wahktieh, Nongrah myn ha ka 30 tarik Jymmang.
“Ngi la thoh sha u Myntri kam Pohiing ma Lahkmen Rymbui bad ngi la ban jur ba dei ban pynduh jait ia kum kine ki jingkheiñ sting bad jingjai tuh jong ki briew ba bat ia ka aiñ namar ngim lah ban pdiang ia kane badban sngewthuh ba bun ki Kynthei kin ym shu leit rung kai sha ki Thanad Pulit khlem ka kam” ong I Kong Phidalia Toi Chairperson ka MSCW haba iakren bad ki lad pathai khubor.
Kat kum ka jingong jong I, kane ka jingjia ka lah ban nym jia jin ba ki pulit kila shimkhia mardor ia ka jingujor bala mudui da ka Kmie jong kine ki Khyllung ha ka 27 tarik Jymmang.
“Lai sngi shuwa ba kane ka jingjia ba shyrkhei kan jia, I Kmie ila leit ujor sha Thanad Pulit ba u Kurim jong I (J Jana) ula ktah kti ia I ha surok katba I dang don ha lynti ban leit bylla. Hynrei ki Pulit kim shym la leh eiei hynrei ong pynban ba kane ka dei ka kam iing ba donkam ban pynbeit da ka jingiasyllok khamtam ba u kurim jong I u dei uba dih kyiad” ong I Kong Toi.
“Namar kata, ka jingshem jong ka Women Commission ka long ba ka don ka jingkheiñ sting jong ki Pulit ban leh eiei pyr shah ia une u briew. Jin ba kila leh eiei, kane ka lah ban iada ia ka jingjia (pyniap ia ki Khun)” ila bynrap.
I Kong Toi I pyntip ba ki Dkhot ka Commisson kila shong jingialang bad “Ka rai jong ngi ka long ba kat kaba long, ngin pynbor ba kum kine ki jingjia (jingkheiñ sting ki Pulit) kim dei ban jia shuh”.
Haba kylli, ine I Khliehduh ka MSCW ila ong ba ka burom hi kam dei ban leit sha ki Pulit halor kane ka jingjia tad haduh ka jingkem ia une u briew haba bynrap “Namar ki Pulit kim shym la leh eiei. Ta ka daw ngi la ai jingmut ia ka Sorkar Jylla ban leh da kaba tyngeh halor kane”. I ong ba ki Pulit ki dei ban shimkhia bha ia ki jingud jingnam jong ki Kynthei.
