Nongstoiñ, Risaw 22: Ki riew runar ki bym pat tip ki dei kiei, ki la pynjot dusmon ia ka jaka ieng kai bad ban jngoh kai ia ka jingithiang jong ka kshaid Weinia kaba don ha dewlynnong Nongkhnum.
Katkum ki tyllong khubor bala ioh, la iathuh ba kane ka jingjia ka la jia ha ka miet jong ka 16 tarik u Risaw 2026. Hynrei, la lap ia kane ka kam runar ha ka step jong ka 17 tarik u Risaw 2026 kaba hap ha ka sngi saitjaiñ jong ka taïew.
U nongthoh khubor ula pyrshang ban kylli pyrthew na ki katto katne ngut ki briew kiba shong dukan ha katei ka jaka, ban wad jingtip mano ba donkti ha katei ka kam, hynrei bun napdeng jong ki, kim bna ei ei halor kane.
Hynrei la ïoh jingtip pat ba ka Kur bah jong ka Ïawren bad Ïawlar, ki la dep ban ïashong pyrkhat bad ka Kur bah ka la rah noh ïa katei ka phang ban ïakren sani bad ka shnong ruh ban ïathir jingmut lang kumno ban lap ne ban leh ïa kiba donkti ha katei ka kam leh dusmon.
Ka la don ruh ka jingsuba ïa ki katto katne ngut ki briew kiba donkti ha katei ka kam, hynrei ka jingtohkit na ka shnong ryngkat ka Kurbah ka dang ïaid shakhmat.
