Shillong, Risaw 22: Haba kynthoh pyrshah ia ka Sorkar Jylla halor ka jingialap ban long kiba shai kdar ha ka rukom treikam katba kala leh pat ia ki kam sop sop, ka Hynniewtrep Youths’ Council (HYC) kala pynpaw ba kala don ka rukom jied ha kaban pynpaw ia ka jingpynlut pynsep ha kaba iadei bad ka jingsiew ia ka bai mukotduma.
Ha ka kyrwoh khubor ha ka sngi Palei, u President ka HYC u Bah Roykupar Synrem ula ong, ba kawei ka tnad kala rieh hapoh jongka RTI ban kyntait ban ai ia ki jingtip shaphang u Advocate General u Amit Kumar, katba kawei pat kala long kaba kloi ban pynpaw ia ka jingsiew ia ka bai mukotduma sha u nongiasaid aiñ uba napoh ka jylla.
“Ka HYC kala pynrem jur ia ka Sorkar Jylla kaba la pyndonkam ia ki ar tylli ki buit ha kaba iadei bad ka jingkhuid jingsuba ha ka jingtreikam bad ha ka rukom ai ia ka jingkhein jingdiah” ula ong.
Da kaba banjur ia ka jubab kaba la ioh lyngba ka RTI, ka HYC kala pynpaw, “Ki jubab jong ka RTI kila phla ba ka ophis jong u Commissioner of Excise kila kyntait ban pyni ia ka jingpynlut jong ka tnad ha ka kam mukotduma kaba donbyntalang u Amit Kumar, da kaba kdew ia ka Section 8 jongka RTI Act, katba ka Meghalaya Tourism Development Corporation kala long kaba kloi bad kala pynbiang ia baroh ki jingtip ha kaba iadei bad ki jingsiew kiba iadei bad ki bai mukotduma baroh shi snem sha u nongaibuit ha ka liang aiñ kaba kynthup lang ia u nongiasaid aiñ uba napoh ka jylla”
Ka Council kala pynpaw ba kane ka rukom leh kadei kaei kaei kaba la pynmih ia ki jingkylli kiba sngewkhia bha.
“Balei ka jingkhuid jingsuba bad ka jingai jingkhein kala long kaba lah tang na ka bynta uwei u nongiasaid aiñ hynrei kala kylla long pat ka lad ban iada ha kaban ai jingtip haba ka kynthup ia u Advocate General u Amit Kumar?” la buh jingkylli ka HYC.
“Hato kane ka sorkar ka pyndonkam ia ki kyndon aiñ ki bapher bapher na ka bynta ki nongiasaid aiñ ki bapher bapher” kala kylli shuh shuh.
Ka HYC kala ong, ka jingwanrah ia ka kyndon 8 ban khanglad ban ai ia ki jingtip kiba kynthup ia ka jingpynlut ia ka pisa u paitbah da ki klur tyngka ka long kaei kaei ka bym lah ban pdiang.
“Haba da ki klur tyngka la pynlut ia ka pisa paitbah, ki nongshong shnong ki don hok ban ioh ia ka jubab, ym tang ban shu jied ban ai ia ki jingtip bad ki kyndon aiñ kiba la pyndonkam ban khanglad ia ki jingkylli kiba shongaiñ” la pynpaw ha ka kyrwoh.
Ka HYC kala dawa dei ban ai ia ki jingtip kiba pura, kala bynrap “Ka sorkar ka dei ban ai jingbatai ia kane ka rukom treikam bad dei ban pynbna paitbah ia katei ka jingpynlut jingpynsep da kaba iaid katkum ki kyndon jong ka aiñ”.
Ka Council kala bynrap, “Ki pisa paitbah ka dawa ba dei ban don ia ka jingai ia ka jingkhein jingdiah kaba pura”.
“Ka sorkar kam lah ban ialap shaphang ka jingkhuid jingsuba ha ka rukom treikam bad halor ka jinglut jingsep, katba ha kawei pat ka liang ka leh ia ki kam sop sop bad kiwei pat” la ong ka HYC.
