Shillong, Risaw 22 : Haba pynpaw ba ki jingiakren khlem da pyni bad ka kam ka pynduh ia ka jingshaniah u paidbah, ka Khasi Students Union (KSU) kala dawa ia u Myntri Rangbah ka Jylla Conrad K Sangma ban pyntreikam noh mardor ia ka jingkular bala ai shisnem mynshuwa, ban iakren halor ki jingbym iahap ha ka jingthungkam ha NEIGRIHMS bad ka Sorkar Pdeng.
Ha ka shithi pynkynmaw kaba la aiti ha ka sngi Palei, ka KSU ka la ong ba ka rai ban pynsangeh shipor ïa ka jingïakhih shong kyllaiñ myngngor ba khlem buh por ha NEIGRIHMS ha ka 5 tarik Jymmang, 2025, ka dei kaba la pynshong nongrim halor ki jingkular jong ka Sorkar Jylla, hynrei, haduh mynta, kata ka jingkular ka dang sah tang ha ki kot ki sla.
“Ka seng ka kwah ban pynkynmaw ïa phi shaphang ki mat kiba la pynsngew halor ka rukom thungkam ha NEIGRIHMS, kiba dang sah khlem da pynbeit, watla ka Sorkar Jylla ka la ai jingkular ha ka por ba ka la tuklar ïa kane ka kam,” ong ka shithi.
Haba pynkynmaw ïa ka jingïakhih, ka KSU ka la ong, “Ha ka 1 tarik Jymmang, 2025, ka KSU ka la pynlong ïa ka jingïakhih shong kyllaiñ myngngor khlem buh por ha NEIGRIHMS, ban pynpaw ïa ki jingsngewkhia halor ka rukom thungkam, ka jingthung kam ia ki kyrtong trai ri bad ka jingdonkam ban pynthikna ïa ki lad ïohkam kiba biang na ka bynta ki paidbah ka Meghalaya.”
Ka seng ka la ong ba ki jingdawa jong ka ki long kiba shai, kata, “ban bishar bniah biang ïa ka jingïasam 20:80 hapdeng ki shynrang bad ki kynthei ha ka thungkam nurse, ban bishar biang ïa ki kyndon bhah kam na ka bynta ki jaitbynriew trai ri trai muluk, bad ban pynlong ïa ki eksamin thungkam da ka NEIGRIHMS hi, ryngkat bad kiwei pat ki mat kiba ïadei bad kane.”
Ïa ka jingïakhih la pynsangeh shipor hadien ka jingwan tuklar jong ka kynhun kaba lamkhmat da u Myntri Sorkar barim, Bah Paul Lyngdoh.
“Ka seng ka la pynsangeh shipor ïa ka jingïakhih ha ka 5 tarik Jymmang, 2025, da ka jingshaniah bad jingsngewnguh ïa ki jingkular kiba la pynsngew da ka Sorkar Jylla,” ong ka KSU.
Katkum ka jingong ka KSU, ka jingkular kaba kongsan ka long ba ka Sorkar Jylla kan pynbeit ïa ka jingïalang bad u Myntri ka Sorkar Pdeng ba dei khmih ïa ka Ministry of Health and Family Welfare.
“Ka Sorkar Jylla kan shim ïa ka sienjam ban pynbeit ïa ka jingïakren bad u Myntri ka Sorkar Pdeng khnang ba ki jingeh kiba la pynsngew da ka KSU kin lah ban poi sha ki bor ba dei peit ha ka kyrdan jong ka ri,” pynkynmaw ka KSU.
Ka KSU ka la ong ba ka la pynkynmaw biang ïa kane ka jingkular ha ki jingïalang kiba la long bad ka Sorkar ha ka 26 tarik Nailar bad kumjuh ruh bad u Chief Secretary ha ka 8 tarik Nailur, 2026, hynrei haduh mynta ym pat lah ban pynlong ïa kata ka jingïalang.
“Watla ka por kala iaid la bun bnai, ym pat don kano kano ka jingiaid shaphrang ka kam, kaba lah ban sakhi ha kaba ïadei bad ka jingpynbeit ïa ki mat kiba la pynsngew,” la ong ka KSU.
Ka KSU ka la pynskhem ba ka NEIGRIHMS kum ka institute kaba pawnam ha ka ri, kam lah ban leh klet ïa ki jingdonkam jong ki paidbah ka Jylla.
