Shillong, Jylliew 17: Kawei ka skul Adhoc jong kawei ka shnong kyndong ka West Jaiñtia Hills District, hynne ka sngi kala plie bad pynlong skul wat hapdeng ka jingther u slap, kaba long pyrshah ia ka hukum jong ka Sorkar Jylla ba phah khang ia baroh ki skul ha Jylla haduh ka 20 tarik Jylliew.
Ki Khynnah skul jong ka Kyndongtuber Secondary School kila hap ban jam na ki jaka shlem um ban poi sha skul, ong ka tyllong khubor ba ioh lum.
“Kane ka pyni ia ka jingbym kheiñ snep ia ka hukum ka Sorkar Jylla da ki bor pyniaid jong kane ka skul” ong ki Nongshong shnong kane ka shnong (kiba kyrpad ban buhrieh kyrteng) haba kyntu ia ka Sorkar Jylla ban leh eiei mardor pyrshah ia kane skul kaba buh ia ki jingim jongki Khynnah hapdeng ka jingma.
Ha ka sngi palei, ka Sorkar Jylla kala bthah ia baroh ki skul ha Jylla ban khang khyrdep naduh ka 17 tarik Jylliew haduh ka 20 tarik Jylliew namar ka jingjur palat jong u slap bad na ka bynta ka jingshngaiñ jong ki khynnah skul.
U Commissioner Secretary ka Tnad Education Dr BDR Tiwari ula ong ba kane ka hukum kala mih namar ka jingjur jong u slap bad ka jingmaham jong kaMeteorological Department (IMD) Sillong ba ka jingjur u slap kan dang iai neh ha Jylla Meghalaya ha kine ki san sngi ban wan.
La bthah ia ki Deputy Commissioner ban peit thuh ia ka jinglong jingman bad shong bishar ia ki jinglong jingman na kawei ka jaka sha kawei pat haba iadei bad ka jingshngaiñ ban plie biang ia ki skul hala ki jong ki District.
