Ther kylla u Myntri ia u Bah Ardent | “Kahdum ki Itkhmat iong ban iohi ia ka jingshisha halor ka TET”

Shillong, Iaiong 24 : U Myntri ka Tnad Pule Puthi Bah Lahkmen Rymbui ha ka sngi Thohdieng, ula ther kylla ia u President ka VPP Bah Ardent Basaiawmoit namar ka jingkynnoh ba ka Sorkar Jylla kala pynibor ia ki Nonghikai da kaba bthah ba kin pass ia ka Meghalaya Teacher Eligiblity Test (MTET), haba kynthoh ba kane ka jingkren ka dei kaba hap pynrem bad kynnoh ia une u nongialam ka VPP ba “um sngewthuh ia ka jingshisha”

‘Ka jingkren jong u ba kynnoh ba ngi pynibor ia ki nonghikai da kaba bthah ba kin hap pass ia ka MTET ka dei kaba hap pynrem jur namar ba um sngewthuh ia kaei ka jingshisha. Hashuwa ba pynmih ia kum kine ki jingkynnoh, nga sngew ba u dei nyngkong ban wad ia ki daw ha lyndet ia kum kine ki rai” ong u Bah Rymbui haba iakren bad ki nongthoh khubor.

“Hynrei, u bah Ardent, tip na kane ka daw, u iohi lut ia kiei kiei baroh lyngba ki ‘Itkhmat iong’ jong u bad lyngba ki lens kiba dum ngit, bad dei namar kata ba um iohi satia ia ka jingshisha” ula ong.

U Myntri ula ong ba ka Teacher Eligibility Test ka dei kaba la buh kyndon hapoh ka Right to Children to Free and Compulsary Education Act, 2009 bad la pynksan da ka Iingkashari Supreme Court ha ka 1 tarik Nailur, 2025.

“Ka hukum ka ong ba baroh ki nonghikai kin hap pass ia ka TET, kam pher katno snem ki shakri, lait noh tang kito kiba sah satang 5 snem ban shakri, kiba la pynlait ban iakhun ia ka TET. Hynrei, kin duh noh ia ka jingkiew kyrdan” ula ong.

“Te mynta, mano ba ialam bakla, mano ba pynibor?” ong u Bah Rymbui haba ban jur ba ka Sorkar Jylla kan hap ban iaid kat kum ka ain.

“Ngi hap ban sngewthuh ba la synshar ia ki da ka ain bad ngi hap ban bud ia ka ain… kane ka ain, ka hukum ka Supreme Court, kam treikam tang ha Meghalaya, ka treikam ha baroh kawei ka ri India” ula ong haba bynrap ba tang ki jaka pule jong ki ritpaid ki dei kiba lait ia mynta katba dang sahteng ka jingbishar ha ka Iingkashari ba kham hakhlieh.

“Kumta, ban ong ba ka Sorkar ka pynibor ia ki nonghikai da kaba bthah ia ki ba kin ialeh ia ka MTET ka dei kaba bakla shibun namar ki nonghikai ruh ki tip shai bha ia kane” ula ong.

U Myntri u pyntip ba ka Jylla kala file ia ka review petition ne ka jingkyrshan ban bishar thymmai ha ka Iingkashari Surpeme Court.

“Ka Sorkar, ruh, namar ka sngewthuh bad kam lah ban klet ia ka jingnoh synniang ki nonghikai kiba la shakri da ki phew snem, kala file ia ka review petition….bad ia mynta ka hukum ka Supreme Court ba 1 tarik Nailur, 2025 ka dei kaba dang ieng” ula ong.

“Nonghikai baieid, kumba long ki kam mynta, ka hukum ka Supreme Court jong u Nailur 2025, ka dang ieng bad baroh kin hap ban pass ia ka TET hapoh ka 31 tarik Nailar 2027, lait noh tang kito kiba sah satang 5 snem ha ka jingshakri” ong u Bah Rymbui haba bynrap “Ban kyrshan ia ki nonghikai kiba dang don ha ka kam, ka Sorkar kan pynlong ia ka TET haduh ar wat, lada long wat haduh lai wat hashuwa ka 31 tarik Nailar 2027”.

Ula bynrao ba katba ka TET rules ka donkam ia ka D.El.Ed bad 45% ha ka klas XII, “ngi ong baroh ki nonghikai ba dang don ha ka kam ki lah..ki lah ban aplai ban iakhun ia ka TET”. U iathuh ba ka tnad Pule Puthi, lyngba ka DERT kala ai ia ka jingkyrshan ha ka jingpynkhreh ia ki eksam.

“Ngi la pynmih ia ki Guide/Help Book na ka bynta kito kiba iakhun ia ka TET namar ngi kwah ba baroh kin ia pass mut. Kila hikai la bun snem, shano kin leit lada ka Supreme Court kam pynkylla ia ka hukum hapoh ka 31 tarik Nailar 2027” ula ong.

U Bah Rymbui u pyntip ba ula thoh sha u Myntri ka tnad Pule Puthi ka Ri bad u Myntri Rangbah ka Jylla ruh ula iakren bad ka Sorkar Pdeng halor ka jingdonkam ban pynkylla ia ka RTE Act “ ban pynlait noh ia ki nonghikai bala hikai slem”.