Shillong, Iaiong 24 : Ka Iingkashari Meghalaya High Court kala bthah ban klop lang hajuh ia ki lai tylli ki ejahar bala register pyrshah ia u MDC barim Sofior Rahman halor ka jingthoh jong u ha Facebook, haba pynpaw ba ym lah ban pynlong ia bun ki jingtohkit halor kajuh ka daw.
Ha ka hukum ba pynmih ha ka sngi Palei (23 Iaiong), ka Iingkashari ka Chief Justice Revati Mohite Dere, kala pynwai noh ia ka ujor bala muduida u Rahman ba kyrpad ban sei madan ia baroh ki ejahar pyrshah ia u bad ban klop lang hajuh ia ki case bala mudui ha ki Police Station bapher bapher hapoh ka Jylla.
“La hukum ban pyntreikam mardor ia kine ki kyndon bad ia kane ka mudui la pynwai noh” hukum ka Iingkashari.
Kat kum ka hukum, u Rahman, ia uba la niew kum u nongialam ka thain bad MDC barim, ula “pynsawa ia ka sur na ka bynta ki jaidbynriew bar jylla ha kiba bun ki khep na ka bynta ka jingiashimbynta ki jaidbynriew bar jylla ha ka elekshon GHADC 2026 lyngba ki rynsan social media kata ka ‘Facebook’ ha ka kyrteng jong u bad lyngba ki kot khubor”.
Ka Iingkashari ka pynpaw ba ka jingpeitngor bha ia ka rynsan social media kata ka Facebook bala pyndonkam ha ka kyrteng jong u nongmudui, la shem ba la pynphriang paidbah, ia kaba u nongmudui u pynpaw ba ka long ka jingai ding, pynbitar bad kaba lah ban pynthut ia ka suk ka sain u paidbah bad hapdeng ki jaidbynriew bapher bapher.
Lai tylli ki ejahar la mudui halor kajuh ka jingthoh kaba kynthup ka P.S. Case No.19/2026 ha Araimile Police Station myn ha ka 10 tarik Lber 2026 hapoh ka kyndon 196(a)(b)/351(2) jong ka BNS, 2023, bud sa ka ujor da u riewshimet hapoh ka P.S. Case No.07/2026 ha Songsak Police Station myn ha ka 12 Lber 2026, hapoh ka kyndon 196(1)/197(1)/352/353 (1)(b)(c)(2) jong ka BNS, 2023, bad ka ejahar na u Organizing Secretary ka A’chik State Peoples’ Front bad P.S. Case No.32/2026 ha Tura Police Station myn ha ka 15 tarik Lber, 2026, hapoh ka kyndon 192/196(1)/353(1)(2)/57 jong ka BNS, 2023, pule lang bad ka kyndon 6A/8B jong ka MMPO Act bad kyndon 8A/11 jong ka MMPO (Autonomous District) Act, bala pynshong nongrim kat kum ka ujor na u Heh Pulit.
U Senior Advocate K Paul, uba mihkhmat ia u Rahman, ula pyntip ba “lai tylli ki case la register pyrshah ia u nongmudui kala mih na kajuh ka jingthoh ha Facebook”.
Ula pynshong nongrim na ka mukotduma TT Antony v. State of Kerala (2001), bad ka Amish Devgan v. Union of India (2021), haba iasaid ba baroh lai tylli ki ejahar dei ban hap klop lang hajuh namar kam lah long ban don la ka jong ka jingtohkit halor kajuh ka daw”.
Halor kane, ka Chief Justice kala hukum ba ia kine ki lai tylli ki ejahar dei ban kloplang hajuh bad ki ejahar bala register ha Tura Police Station bad Songsak Police Station ( ba la pynkynriah noh sha ka Crime Branch Police Station (CBPS), Western Range Tura), yn pynkynriah noh sha Araimile Police Station, kaba la ioh pdiang ia ka ejahar ba nyngkong pyrshah ia une u nongmudui.
